Aprophétie ti Bible nga na aye so asi na yâ ti mbaï afa polele so Jésus akomanse ti komande na yayu tongana Gbia na ngu 1914, ye so afa tongo nda ti lâ ti nda ni ti aye ti ngoi ti Satan ge na ndö ti sese. Na peko ti so Jésus aga Gbia nyen la lo sara? Eskê hio lo zi awakua ti lo na sese na gbe ti Babylone, Ngangu gbata? Eskê lo zia “ngbâa be-ta-zo so ayeke sara ye na ndara” na ngu 1914 na lo komanse kota kua ti kongo lê ti kobe?​—Mat. 24:⁠45.

Ên-ën. Girisa ape so yingo ti Nzapa apusu lani bazengele Pierre ti tene so fango ngbanga ayeke ‘to nda ni na yâ ti da ti Nzapa.’ (1 Pi. 4:​17). Legeoko nga, prophète Malachie atene kozo awe tënë ti ngoi so Jéhovah ayeke ga na yâ ti da so a yeke voro lo dä lo na “watokua ti mbele ni”, Molenge ti Nzapa (Mal. 3:​1-⁠5). Ngoi ni so ayeke duti ngoi so na yâ ni a yeke zi saleté na terê ti awakua ti Nzapa nga a yeke tara ala. Aye so asi na yâ ti mbaï ague oko na aye so aprophétie so afa?

 En. Ti londo na ngu 1914 ti si na tongo nda ti ngu 1919 ayeke lani mbeni ngoi ti angangu tara nga na ti zingo saleté na terê ti aWamandango Bible, so a iri ala fadeso aTémoin ti Jéhovah. Na ngu 1914, bê ti awakua ti Nzapa mingi so ayeke na sese anze ndali ti so hunzingo ti aye ti ngoi so asi pëpe tongana ti so ala ku terê ti ala fade na ni. Na ngu 1916, vundu akiri asara ala mingi ndali ti kuâ ti Charles Russell, so amû li ni lani nzoni mingi na popo ti awakua ti Nzapa. Ambeni so aye lani Ita Russell mingi adö sese ngangu na a-effort so Joseph Rutherford, so amû li ni na peko ti lo, ayeke sara. Kangbi aga na popo ti ala na asara si a ngbâ kete yâ ti bungbi ti Jéhovah akangbi na ngu 1917. Na pekoni, na ngu 1918, na bango ni akota zo ti nzapa asara si a gue na Ita Rutherford nga na ambeni mba ti lo mbasambala na ngbanga, na a tene so tënë ayeke na li ti ala atâa so ala sara ye oko ape nga a bi ala na kanga. A kanga yanga ti kota ndokua ti e na Brooklyn. A yeke polele so ade a zi lani pëpe azo ti Nzapa na gbe ti Babylone, Ngangu gbata.

Me nyen la apassé lani na ngu 1919? Na peko ti so a zi ala, aye so asi ague na li ni hio hio mingi na mbeni fason so ahon gbungo li ti zo. Na tongo nda ti ngu ni, a zi Rutherford na amba ti lo na kanga. Ala kiri droit na terê ti kua. Hio, ala leke ti sara mbeni kota bungbi nga ala leke ti komanse kua ti sigingo na mbeni fini mbeti, L’Âge d’Or (so a iri ni fadeso Zingo na ­lango!). A sigi na fini mbeti so ti sara na kua na ngoi ti akapa ti fango tënë. Na ndö ni, a zia na yâ ti acon­grégation oko oko kue mbeni surveillant ti leke yâ ti kua ti fango tënë nga ti sara si amaï. Na oko ngu so, a sigi na Bulletin (so a iri ni fadeso Mbeti ti bungbi: ­Kusala ti e nga na gigi ti e ti Chrétien) ti mû maboko ti leke yâ ti kua ti fango tënë.

Nyen la asi lani? A yeke polele so, Christ azi lani azo ti lo na gbe ti Babylone, Ngangu gbata. Lo zia lani ngbâa be-ta-zo so ayeke sara ye na ndara. Kua ti kongo lê ti kobe akomanse lani. Ngbene ye na ngu 1919, so ayeke mbeni ngu so ayeke kota mingi so, kua ti fango tënë ague na li ni na mbeni lege so adö bê mingi.