Bijbel profeititori nanga den sani di pasa na grontapu e sori krin taki Yesus bigin tiri leki Kownu na ini hemel na ini 1914. Na ini a yari dati den lasti dei fu Satan grontapu bigin. San Yesus du di a tron Kownu? Na wantewante a frulusu Gado pipel fu Babilon a Bigiwan? A poti „a koni srafu di de fu frutrow” na wroko? Noso a bigin nanga a kotiwroko na ini a yari dati?​—Mat. 24:45.

A de krin taki dati no de so. Hori na prakseri taki na apostel Petrus ben skrifi taki Gado o bigin koti krutu „na a oso fu en fosi” (1 Petr. 4:17). A profeiti Maleaki ben skrifi wan profeititori tu di e sori taki Yehovah ben o kon na en tempel makandra nanga „a boskopuman fu a frubontu”, dati na a Manpikin fu Gado (Mal. 3:1-5). Na a ten dati a pipel fu Gado ben o kisi omeni tesi èn Yehovah nanga Yesus ben o krin na organisâsi. Sani pasa soleki fa den profeititori e sori?

 Iya, den profeititori kon tru! A pisi ten fu 1914 te go miti 1919 ben muilek gi den Bijbel Ondrosukuman (na so Yehovah Kotoigi ben nen na a ten dati). Den kisi furu tesi. Na ini 1914, furu fu den anbegiman fu Gado na grontapu ben fruwakti taki a kaba ben o kon èn den ben lasi-ati di dati no pasa. Moro sma lasi-ati di Brada Charles T. Russell, di ben teki fesi na ini na organisâsi, dede na ini 1916. Sonwan fu den brada nanga sisa di ben lobi Brada Russell ben gens Brada Joseph F. Rutherford, di bigin teki fesi baka di Brada Russell dede. Yu bigin kisi pikin grupu na ini na organisâsi tu èn bijna na organisâsi prati na ini 1917. Na ini 1918, den kerki fesiman tyari Brada Rutherford nanga seibi tra brada di ben teki fesi go na krutu. Lanti leisi strafu gi den brada disi aladi den no du nowan ogri èn den poti den na strafu-oso. Baka dati den tapu na edekantoro na Brooklyn. A ben de krin taki Gado pipel no ben komoto ete na katibo fu Babilon a Bigiwan!

Ma san pasa na ini 1919? We, gawgaw sani kenki. Na a bigin fu a yari den lusu Brada Rutherford nanga den tra brada di ben de na strafu-oso. Wantewante den bigin wroko baka! A no teki langa fosi den orga wan kongres èn den bigin seti sani fu tyari wan nyun tijdschrift, „A Gowtu Ten” (now a nen Ontwaakt!), kon na doro. Den ben o gebroiki a nyun tijdschrift dati na ini a preikiwroko. Boiti dati, den ben poti wan fesiman na ini ibri gemeente fu orga sani èn fu gi den brada nanga sisa deki-ati fu du a preikiwroko. A srefi yari dati den tyari a Bulletin (now a nen Wi Kresten libi nanga a preikiwroko​—Studie-buku), kon na doro. A ben o yepi den fu orga a preikiwroko moro bun.

San ben pasa? A de krin taki Krestes ben puru en pipel na ini katibo fu Babilon a Bigiwan. A ben poti a koni srafu di de fu frutrow na wroko. A kotiwroko ben go doro. Sensi a prenspari yari 1919, a wroko go na fesi heri esi.