Tiphrofetho letiseBhayibhelini kanye nemlandvo kusicinisekisa kutsi Jesu wacala kubusa njengeNkhosi ezulwini nga-1914, lokwakhombisa kucala kwemalanga ekugcina alelive laSathane. Yini Jesu layenta ngesikhatsi aba yiNkhosi? Washeshe watikhulula yini tinceku takhe lebetitfunjwe yiBhabhulona Lenkhulu? Wasibeka yini “sisebenti lesetsembekile nalesihlakaniphile” nga-1914 futsi wacala nemsebenti lomkhulu wekuvuna?—Mat. 24:45.

Cha. Khumbula kutsi umphostoli Phetro waphefumulelwa kutsi abhale kutsi kwehlulela bekutawucala “endlini yaNkulunkulu.” (1 Phet. 4:17) Ngalokufanako, nemphrofethi Malakhi wakhuluma ngesikhatsi lapho Jehova atawufika endlini yakhe yekukhontela ahamba ‘nesitfunywa sesivumelwane,’ lokuyiNdvodzana yakhe. (Mal. 3:1-5) Leso bekutawuba sikhatsi sekuhlantwa nesekuvivinywa. Umlandvo uyavumelana yini naletiphrofetho?

 Yebo uyavumelana! Kusukela nga-1914 kuye ekucaleni kwa-1919 kwaba sikhatsi lesimatima sekuvivinywa nekuhlantwa kweBafundzi beliBhayibheli, njengobe BoFakazi BaJehova bebatiwa kanjalo. Nga-1914 bantfu baNkulunkulu labanyenti emhlabeni badvumateka ngesikhatsi kuphela kungefiki njengobe bebacabanga. Badvumateka nakakhulu nga-1916 ngesikhatsi kufa Charles T. Russell, lobekasolo abahola ngekutimisela bantfu baNkulunkulu. Labanye lebebamtsandza kakhulu uMzalwane Russell, abazange bayisekele imetamo yaJoseph F. Rutherford, lowangena esikhundleni saRussell sekuhola bantfu baNkulunkulu. Nga-1917, enhlanganweni kwavela emacembu lehlukahlukene kangangekutsi yacishe yehlukana ekhatsi. Nga-1918, bafundisi benta kutsi uMzalwane Rutherford kanye nalabangu-7 labambisene nabo baboshwe futsi bagwetjwe babe bete licala. Indlunkhulu lebeyiseBrooklyn yavalwa. Kuyacaca kutsi bantfu baNkulunkulu bebasengakakhululwa ekutfunjweni yiBhabhulona Lenkhulu.

Kepha yini leyenteka nga-1919? Ngekushesha tintfo tabese tigaya ngalomunye umhlatsi! Nakucala lomnyaka wa-1919, Rutherford kanye nalabo lebekabambisene nabo, bakhululwa ejele futsi babuyela emsebentini. Ngekushesha kwahlelwa umhlangano wesifundza lowacopha umlandvo, futsi incwadzi lensha i-The Golden Age, (nyalo lebitwa ngekutsi yi-Phaphama!) yacala kusebenta. Lencwadzi lensha beyihlelelwe imikhankaso yekushumayela. Ngetulu kwaloko, ebandleni ngalinye kwabekwa umcondzisi wensimu kuze ahlele futsi atfutfukise umsebenti wekushumayela. Ngaloyo mnyaka kwashicilelwa i-Bulletin (nyalo leseyibitwa ngekutsi Kuphila KwemaKhristu Nemsebenti Wawo—Incwajana Yekubhalela Emihlanganweni) kute isite emsebentini wekushumayela.

Yini leyentekile? Kuyacaca kutsi Khristu besekabakhululile bantfu bakhe ekutfunjweni yiBhabhulona Lenkhulu. Besekabeke sisebenti lesetsembekile nalesihlakaniphile. Umsebenti wekuvuna besewucalile. Kusukela ngalomnyaka lobalulekile wa-1919, lomsebenti bewusolo uchubeka ngelizinga lelisetulu kakhulu.