Vuprofeta bya Bibele ni leswi endlekeke ematin’wini swi swi veka erivaleni leswaku Yesu u sungule ku fuma tanihi Hosi etilweni hi 1914, leswi kombiseke ku sungula ka masiku ya makumu ya misava ya Sathana. I yini leswi Yesu a swi endleke loko a ha ku va Hosi? Xana u nambe a ntshunxa malandza yakwe ya laha misaveni evuhlongeni bya Babilona Lonkulu? Xana u hlawule “nandza [wakwe] wo tshembeka ni wo tlhariha” hi 1914 kutani a sungula ntirho lowukulu wa ntshovelo?—Mat. 24:45.

A swi vanga tano. Tsundzuka leswaku muapostola Petro u huhuteriwe ku tsala leswaku ku ta “rhanga ku avanyisiwa yindlu ya Xikwembu.” (1 Pet. 4:17) Muprofeta Malakiya na yena u profete hi nkarhi lowu Yehovha a a ta ta endlwini Yakwe ya vugandzeri swin’we ni “murhumiwa wa ntwanano,” ku nga N’wana wa Xikwembu. (Mal. 3:1-5) Wolowo a ku ta va nkarhi  wa ku basisiwa ni ku ringiwa. Xana leswi endlekeke ematin’wini swi pfumelelana ni vuprofeta byebyo?

Swa pfumelelana! Nkarhi wa ku sukela hi 1914 ku ya eku sunguleni ka 1919 a ku ri nkarhi wo tika wa ku ringiwa ni wa ku basisiwa ka Swichudeni swa Bibele hilaha Timbhoni ta Yehovha a ti tiviwa hakona. Hi 1914 malandza yo tala ya Xikwembu laha misaveni ma hele matimba loko makumu ma nga fikanga hilaha a ma langutele hakona. Hi 1916 xiyimo xi ye xi nyanya ku tika loko ku fa Charles T. Russell, loyi a a rhangela vanhu va Xikwembu. Van’wana lava a va n’wi rhandza ngopfu Makwerhu Russell va swi veke erivaleni leswaku a va swi lavi ku rhangeriwa hi Joseph F. Rutherford, loyi a a rhangela vanhu va Xikwembu endzhaku ka rifu ra Makwerhu Russell. Ku ve ni ku avana naswona a ku sale katsongo nhlangano wu avana hi 1917. Hi 1918, hikwalaho ka nkucetelo wa vafundhisi, Makwerhu Rutherford ni van’wana va nkombo va ringiwile, va khomiwa ni ku pfaleriwa ejele va nga dyanga xa munhu. Ntsindza wa vona eBrooklyn wu pfariwile. Swi le rivaleni leswaku vanhu va Xikwembu a va nga si tshunxiwa evuhlongeni bya Babilona Lonkulu!

Kambe ku humelele yini hi 1919? Swilo swi cince hi ku copeta ka tihlo! Eku sunguleni ka lembe rero, Rutherford ni vanghana vakwe va tshunxiwile ejele. Va nambe va nghena entirhweni! Swi nga si ya kwihi, ku khomiwe nhlengeletano leyi nga rivalekiki naswona ku tivisiwe ku humesiwa ka magazini lowuntshwa wa The Golden Age, (sweswi ku nga Xalamuka!). Magazini wolowo a wu endleriwe ku tirhisiwa eka matsima loko ku chumayeriwa. Nakambe eka vandlha rin’wana ni rin’wana ku hlawuriwe mulanguteri leswaku a ta hlela ni ku rhangela entirhweni wo chumayela. Lembe rero ku tlhele ku humesiwa Bulletin (sweswi ku nga Xibukwana Xa Mahanyelo Ni Ntirho Wa Hina Wo Chumayela) leswaku yi ta pfuna leswaku ku chumayeriwa hi ndlela yo hleleka.

A ku endleke yini? Swi le rivaleni leswaku Kreste a a ntshunxe vanhu vakwe evuhlongeni bya Babilona Lonkulu. A a hlawule nandza wakwe wo tshembeka ni wo tlhariha. Ntirho wo tshovela se a wu sungurile. Ku sukela hi lembe rero ro hlawuleka ra 1919, ntirho wu ye emahlweni hi rivilo lerikulu swinene.