Vhuporofita ha Bivhili na mafhungo a ḓivhazwakale, zwi sumbedza uri Yesu o thoma u Vhusa ṱaḓulu nga 1914. Zwenezwo zwo amba u thoma ha maḓuvha a vhufhelo a ḽino shango ḽivhi ḽa Saṱhane. Yesu o ita mini musi a tshi vha Khosi? Naa o ṱavhanya a vhofholola vhashumeli vhawe vhuthubwani ha Babele Ḽihulu? Naa o vhea “mulanda a fhulufhedzeaho na wa vhuṱali” nga 1914 nahone a thoma mushumo muhulu wa khaṋo?—Mat. 24:45.

Zwi tou pfala uri a zwo ngo ralo. Ri songo hangwa uri muapostola Petro o hevhedzwa uri a ṅwale uri khaṱhulo i ḓo “thoma kha vha nnḓu ya Mudzimu.” (1 Pet. 4:17) Nga hu fanaho, na muporofita Maḽeaxi o dzula o amba nga ha tshifhinga tshine Yehova a ḓo ḓa nḓuni Yawe ya vhurabeli e na “muḓinḓa wa mulanga,” ane a vha Murwa wa Mudzimu. (Maḽ. 3:1-5) Tshenetsho tsho vha tshi tshifhinga tsha u kunakiswa na u lingwa. Naa ḓivhazwakale i a tendelana na eneo mafhungo a vhuporofita?

 Ee, i a tendelana nao! U bva nga 1914 u swika mathomoni a 1919, ho vha hu tshifhinga tshi konḓaho kha Vhagudi vha Bivhili samusi vho vha vha tshi khou lingwa na u kunakiswa. Nga tshenetsho tshifhinga, Ṱhanzi dza Yehova dzo vha dzi tshi vhidzwa Vhagudi vha Bivhili. Vhunzhi ha vhathu vha Mudzimu vho kulea nungo musi vhufhelo ha ḽino shango vhu songo tsha ḓa nga 1914, samusi vho vha vho lavhelela uri vhu ḓo ḓa nga wonoyo ṅwaha. Vho tou ṋaṋa u kulea nungo nga 1916, musi Vho-Charles T. Russell vha tshi lovha, samusi ho vha hu vhone vhane vha khou ranga phanḓa vhathu vha Mudzimu. Vhaṅwe vhe vha vha vha tshi funesa Wahashu Vho-Russell, vho vha vha sa ṱoḓi u rangiwa phanḓa nga Vho-Joseph F. Rutherford, vhe vha dzhena vhudzuloni ha Vho-Russell. Zwenezwo zwo ita uri hu si tsha vha na vhuthihi. Zwo ṱoḓa u fhandekanya ndangulo nga 1917. Nga 1918, vhafunzi vho pomoka mazwifhi Wahashu Vho-Rutherford na vhashumisani navho. Vho ṱuṱuwedza uri vha valelwe dzhele vha si na mulandu. Ofisi Khulwane dza Brooklyn dzo mbo ḓi valwa. Zwi tou pfala uri vhathu vha Mudzimu vho vha vha sa athu u vhofhololwa Babele Ḽihulu!

Fhedzi ho itea mini nga 1919? Zwithu zwo shanduka nga u bonya ha iṱo! Mathomoni a wonoyo ṅwaha, Vho-Rutherford na vhashumisani navho, vho bviswa dzhele. Vha mbo ḓi vhuyelela mushumoni nga tshenetsho tshifhinga! Nga u bonya ha iṱo, ha mbo ḓi dzudzanywa buthano ḽi sa hangwei, ha thoma u gandiswa magazini muswa une wa vhidzwa The Golden Age, (une zwino wa vhidzwa Awake!) Wonoyu magazini muswa wo vha wo itelwa u shumiswa tsimuni. Zwiṅwe hafhu, tshivhidzoni tshiṅwe na tshiṅwe ho vhewa muhulwane wa tshivhidzo uri a dzudzanye tsimu na u ṱuṱuwedza vhathu uri vha ye tsimuni. Nga wonoyo ṅwaha, ho gandiswa na Bulletin (ine zwino ya vha Tshibugwana Tsha Muṱangano Wa Vhutshilo Na Vhuḓinḓa Hashu Ha Vhukriste) u itela u dzudzanya mushumo wa u huwelela.

Ho itea mini? Zwi tou pfala uri Kristo o vhofholola vhathu vhawe vhuthubwani ha Babele Ḽihulu. O vhea mulanda wawe a fhulufhedzeaho na wa vhuṱali. Mushumo wa u kaṋa wo vha wo thoma. U bva nga wonoyo ṅwaha wo khetheaho wa 1919, mushumo wo bvela phanḓa u swika kha vhuimo vhu akhamadzaho.