Le profecíaʼob bey xan le baʼaxoʼob tsʼoʼok u yúuchloʼoboʼ ku yeʼeskoʼobeʼ Jesúseʼ káaj u gobernar teʼ kaʼan desde 1914. Teʼ año jeʼeloʼ káaj u tsʼook kʼiiniloʼob u kʼasaʼan yóokʼol kaab Satanás. ¿Baʼax tu beetaj Jesús le ka káaj u beetik u Reyiloʼ? ¿Yaan wa u jáalkʼabtik u kaajal Dios tiʼ le Nojoch Babiloniaoʼ? ¿Yaan wa u yéeyik le esclavo chúukaʼan u yóol yéetel yaan u naʼatoʼ? ¿Yaan wa u káajsik u molik le cosecha teʼ año jeʼeloʼ? (Mat. 24:45).

U jaajileʼ maʼ. Apóstol Pedroeʼ tu yaʼaleʼ le juiciooʼ yaan u káajal «tu yotoch Dios» (1 Ped. 4:17). Tsʼoʼoleʼ le profeta Malaquíasoʼ tu yaʼalaj xan baʼax kʼiin ken taalak Jéeoba tu yotoch junmúuchʼ yéetel Jesús, «le máax túuxtaʼab utiaʼal le pactooʼ» (Mal. 3:1-5). Teʼ kʼiinoʼob jeʼeloʼ yaan u tsʼaʼabaloʼob a pruebail yéetel yaan u yilaʼal máaxoʼob jach tu jaajil táan u meyajtikoʼob Diosoʼ. ¿Jach wa tu jaajil béeychaj le profecíaʼobaʼ?

Yaʼab baʼaxoʼob eʼesik jach bey úuchikoʼ. Desde tu añoil 1914 tak tu káajbal 1919, u testigoʼob Jéeoba kʼaj óolaʼanoʼob bey le j-Xoknáaloʼob tiʼ le Bibliaoʼ tsʼaʼaboʼob a pruebail yéetel ilaʼab  máaxoʼob jach tu jaajil chúukaʼan u yóoloʼob tiʼ Jéeoba. Teʼ año jeʼeloʼ yaʼab tiʼ le máaxoʼob meyajtik Diosoʼ táan kaʼach u páaʼtkoʼob u kʼuchul le xuʼulsajiloʼ, chéen baʼaleʼ le ka tu yiloʼob maʼ bey úuchikoʼ jach lúub u yóoloʼob. Pero tu añoil 1916, maas lúub u yóoloʼob le ka kíim Charles T. Russelloʼ, le máax nuʼuktik kaʼach u kaajal Diosoʼ. Le ka tsʼoʼok u kíimileʼ tsʼaʼab sukuʼun Joseph F. Rutherford u nuʼukt u kaajal Dios, chéen baʼaleʼ jujuntúul máaxoʼob jach naatsʼ yaniloʼob tiʼ le sukuʼun Russelloʼ tu tsʼáajubaʼob tu contra. Leloʼ tu beetaj u yantal mejen grupoʼob, le oʼolal tu añoil 1917, jach óolak u jatsuba le máaxoʼob nuʼuktik le meyajoʼ. Tu añoil 1918, u nuuktakil le religiónoʼoboʼ tu takoʼob u pool sukuʼun Rutherford, le oʼolal kʼaʼal junmúuchʼ yéetel uláakʼ siete sukuʼunoʼob áantik. Le ka úuch lelaʼ kʼaʼal xan le oficinaʼob yaan kaʼach Brooklynoʼ, le tuʼux ku nuʼuktaʼal kaʼach le meyajoʼ. Lelaʼ ku yeʼesikeʼ todavía maʼ jáalkʼabtaʼak u kaajal Dios tiʼ le Nojoch Babiloniaoʼ.

Chéen baʼaleʼ 1919, yaʼab jatsʼuts baʼaloʼob úuchi. Tu káajbal le año jeʼeloʼ jáalkʼabtaʼab sukuʼun Rutherford yéetel le máaxoʼob áantkoʼ. Tu séebaʼanil túuneʼ joʼopʼ u beetkoʼob planes utiaʼal u beetaʼal junpʼéel nojoch asamblea mix bikʼin kun tuʼubsbil. Joʼopʼ xan u beetaʼal junpʼéel túumben revista utiaʼal u maas tsikbaltaʼal u tʼaan Dios, le revistaaʼ tu kʼaabaʼtaj The Golden Age (beoraaʼ kʼaj óolaʼan bey ¡Aajkech!). Tsʼoʼoleʼ tiʼ cada múuchʼulileʼ kʼubéentaʼab tiʼ juntúul anciano ka u nuʼukt yéetel ka u yil u maas tsikbaltaʼal u tʼaan Dios teʼ tuʼux yanoʼoboʼ. Tu añoil 1919 xaneʼ jóoʼsaʼab junpʼéel folleto utiaʼal u kaʼansaʼal le máaxoʼob tsikbaltik u tʼaan Diosoʼ, lelaʼ tu kʼaabaʼtaj Bulletin (beoraaʼ kʼaj óolaʼan bey U juʼunil xook utiaʼal u muchʼtáambalil Kuxtal yéetel Meyaj jeʼex Cristoeʼ).

¿Baʼax ku yeʼesiktoʼon tuláakal le baʼax úuchaʼ? Ku yeʼesikeʼ Cristoeʼ tsʼoʼok u jáalkʼabtik u kaajal tiʼ le Nojoch Babiloniaoʼ yéetel tsʼoʼok u yéeyik le esclavo chúukaʼan u yóol yéetel yaan u naʼatoʼ. Bey káajik le cosechaoʼ. Desde tu añoil 1919, tsʼoʼok u maas yaʼabtal le baʼaxoʼob ku beetik u kaajal Jéeobaoʼ.