MU CHAKA cha 1919, mauchimi ngaŵi ngakuyanana ngangufiskika. Uchimi unyaki ukamba vakukwaskana ndi “viwanga vakumira,” ndipu unyaki ukamba vakukwaskana ndi “akaboni . . . ŵaŵi.” Uchimi wakukwaskana ndi “viwanga vakumira” ungulongo kuti pazamujumpha vyaka vinandi kuti ŵanthu aku Chiuta wo ŵenga akufwa mwauzimu aje so amoyu. (Ezeki. 37:2-4; Chivu. 11:1-3, 7-13) Uchimi wakukwaskana ndi “akaboni . . . ŵaŵi” wakambanga vakukwaskana ndi nyengu yimanavi (yo yingwamba kufiskika kukumaliya kwa 1914 mpaka kukwamba kwa 1919) yo yingumala gulu limanavi la ateŵeti aku Chiuta lati laja so ndi umoyu. Mauchimi ngosi ngaŵi yanga ngakonkhoskanga va chiyuka chauzimu, ndipu ngosi ngaŵi ngangufiskika so mu 1919 pa nyengu yo Yehova wanguchitiskiya kuti ateŵeti ŵaki ami “wima,” ndi kutuwaku ku ukapolu wa Babiloni Mukulu kuti awunganiskiki mu mpingu wo unguwezekiyapu so.—Ezeki. 37:10.

Kweni ziŵani kuti kufiskika kwa mauchimi ngaŵi ngenanga kupambana mu nthowa yinyaki yakukhumbika ukongwa. Uchimi wa “viwanga vakumira,” ungukambiya limu vakukwaskana ndi kuja so ndi umoyu kwa Akhristu wosi akusankhika wo akujaku. Kweni uchimi wa “akaboni . . . ŵaŵi,” ungukambiya limu vakukwaskana ndi kuja so ndi umoyu kwa Akhristu anyaki akusankhika wo akujaku. Akhristu yaŵa ndi wo alongozganga gulu ndipu angusankhika kuja “kapolu wakugomezgeka ndi wazeru.”—Mate. 24:45; Chivu. 11:6. *

1. CHAKA CHA 100 C.E. CHATI CHAJUMPHA

   Kwambiya mu 100 C.E. kuluta kunthazi “chidika . . . chinguzaza ndi viwanga” Akhristu akusankhika ŵati abayika mwauzimu

2. KUKWAMBA KWA 1919

   1919: “Viwanga vakumira,” vinguja so ndi umoyu Yehova wati wachitiska kuti Akhristu wosi akusankhika atuwi mu Babiloni Mukulu ndi kuwungana mu mpingu wo unguwezekiyapu so

1. KUKUMALIYA KWA 1914

   kupharazga avwala “vigudulu”

   1914: “Akaboni . . . ŵaŵi” angwamba kupharazga avwala “vigudulu” kwa vyaka vitatu ndi hafu ndipu pakumaliya paki angubayika mwauzimu

2. nyifwa yauzimu

3. KUKWAMBA KWA 1919

   1919: “Akaboni . . . ŵaŵi” anguja so ndi umoyu kagulu kamanavi ka Akhristu akusankhika wo alongozganga gulu, kati kasankhika kuja “kapolu wakugomezgeka ndi wazeru”