N tabetai ti kona n rangi n taonakinako ni kariri ao kataaki ni maiura, n te aro are ti a korakai ao e a kangaanga bwa ti na waakinako. Ma ngkana a roko taai akanne, ti kona ni kakorakoraaki n iaiangoan te kabwarabwara ae mataata are n ana miitara Etekiera ae taekani manga kaokani bwaai. Bukin tera? Ti reiakinna man te taetae ni burabeti aei, ae e boni kona te Atua are iai mwaakana n uka te ikeike ni maiu ni kaokia nakon ri aika mate, n anganira te korakora ae ti kainnanoia bwa ti aonga n tokanikai i aoni kangaanga aika a tarai aomata bwa akea ae kona n tokanikai iai.​—Wareka Taian Areru 18:29; IBir. 4:13.

Ti bae ni kauringaki ae irabubua te ririki imwain ana bong Etekiera, ao e taekinna te burabeti are Mote bwa e aki tii mwaaka Iehova, ma e boni kani kabongana naba korakorana ibukia ana aomata. E korea ae kangai Mote: “Bon te tabo ni kamanomano te Atua mangkoangkoa, a mena baina aika teimatoa i aam.” (TuaKau. 33:27) Eng, ti kona ni kakoauaa ae ngkana ti tang nakon Atuara n taai ni karawawata, e na boni kaaki baina Iehova i aara, e na karaua n tabekira, ao ni buokira ni manga tei i aoni waera.​—Etek. 37:10.