To whedelẹnu, kọgbidinamẹ po whlepọn he mí to pipehẹ to gbẹ̀mẹ lẹ po sọgan nọ wá húagbọ́ mí sọmọ bọ e na nọ vẹawuna mí nado zindonukọn. Ṣigba, to ojlẹ mọnkọtọn lẹ mẹ, mí sọgan mọ tuli yí eyin mí lẹnnupọndo zẹẹmẹ họnwun he ji numimọ hẹngọwa tọn Ezekiẹli tọn dọhodo lẹ ji. Etẹwutu? Mí sọgan plọn sọn dọdai ehe mẹ dọ Jiwheyẹwhe he tindo huhlọn sọmọ nado hẹn ohú mẹkúkú lẹ tọn gọwá ogbẹ̀ penugo nado na mí huhlọn he sin hudo mí tindo nado duto aliglọnnamẹnu lẹ ji—etlẹ yin dehe sọawuhia taidi nuhe zẹ̀ huhlọn gbẹtọvi tọn go lẹ.—Hia Salmu lẹ 18:29; Flp. 4:13.

Ehe sọgan flinnu mí dọ owhe kanweko susu jẹnukọnna azán Ezekiẹli tọn, yẹwhegán Mose ko dọ dọ gbọnvona dọ Jehovah tindo huhlọn nado yinuwa do omẹ etọn lẹ tamẹ, e sọ tindo ojlo nado wàmọ. Mose wlan dọmọ: “Fibẹtado de wẹ Jiwheyẹwhe yin sọn ojlẹ hohowhenu tọn lẹ mẹ, awà madopodo etọn lẹ tin to oglọ na we.” (Deut. 33:27) Mọwẹ, mí gán deji dọ eyin mí lẹhlan Jiwheyẹwhe mítọn dè to ojlẹ ayimajai tọn lẹ mẹ, Jehovah na dlẹn awà nukunpedomẹgo tọn etọn lẹ do oglọ na mí bo na ze mí daga dẹẹdẹ bosọ gọalọna mí nado fọnṣite do afọ mítọn lẹ ji.—Ezek. 37:10.