MBOKISI 10C
Kutusiwa Kuyema Hape ka Mahutu Aluna
KUNYAKISISA zeluituta kwa pono yeñozwi kwa Ezekiele 37:1-14 kwakona kutiisa tumelo yaluna, mi lwakona kusebelisa zeluituta kwa pono yeo mwa miinelo yelutalimana ni yona zazi ni zazi. Luitutañi kwa pono yeo?
Fokuñwi lukana lwaikutwa kuimezwa ki miinelo yetaata yelukopana ni yona mwa bupilo, mi kukona kulubela taata kuitiyela. Nihakulicwalo, kunahanisisa za pono ya kukutiswa sinca yanaaboni Ezekiele kwakona kulutiisa haluli mwa miinelo yetaata. Libaka? Kakuli bupolofita bo, bululuta kuli Mulimu yanani maata akufa masapo bupilo, wakona luli kulufa maata elutokwa kuli lutiyele miinelo yetaata yelukopana ni yona, nihaiba miinelo yelunahana kuli halukoni kuitiyela.—Mubale Samu 18:29; Mafil. 4:13.
Lilimo zeñata pili Ezekiele asika pepwa kale, mupolofita Mushe naabulezi kuli Jehova unani maata a kutusa batu bahae mi walata kueza cwalo. Mushe naañozi kuli: “Mulimu ki masabelo kuzwa kwakale, mazoho ahae a kamita a kwatasaa hao.” (Deut. 33:27) Ka niti, lwakona kuba ni buikolwiso bwa kuli haiba luitinga ku Mulimu mwa linako zetaata, Jehova ka lilato ukaluswala, kuluyemisa ka tokomelo, ni kulutusa kuyema hape ka mahutu aluna.—Ezek. 37:10.
