Shimbu jimwe tunahase kuhomba mwomwo yavyeseko vize tweji kuhitangamo mukuyoya chetu, kaha tweji kukilikitanga mangana tumike. Chipwe ngocho, nge tuli muukalu wakufwana ngana tunahase kujikiza hakushinganyeka hachakumwenesa vamwenesele Ezekele. Mwomwo ika? Mwomwo Kalunga alingishile vize vifuwa vyaumu viyoye cheka, shikaho nahase kutuhana nayetu ngolo jize najitukafwa mangana tumike muukalu uze vatu navamona ngwavo waukalu chikuma.—Tangenu Samu 18:29; Fwili. 4:13.

Twatela kwanuka nawa ngwetu, myaka yayivulu shimbu kanda Ezekele asemuke, kapolofweto Mose ahanjikile ngwenyi Yehova atwama nangolo, kaha nawa atwama namuchima wakufwila kukafwa vatu jenyi. Mose asonekele ngwenyi: “Kalunga apwa uchinyino wove kufuma kushikulu, mwakakukwachilila namavoko enyi ahaya myaka yosena.” (Lushi. 33:27) Chikupu vene, twatela kufwelela ngwetu kachi nge natupendaminanga hali Kalunga mulwola lwaukalu, kaha mwatukwachilila namavoko enyi nakutukafwa twimane cheka.—Ezeke. 37:10.