Itaria, lö taʼila hadia nifaluada börö waʼoya wamakao mazui abula dödö salua. Lua-luania, lö faʼabölö ba abua khöda ba wangai halowö khö Yehowa. Börö daʼö, tola teʼaroʼö ita na taʼangerönusi gangilata Hezekieli sanandrösa ba wamohouni. Hadia mbörö? Ba wamaʼeleʼö daʼö, tafahaʼö ita wa tola iʼorifi döla zi no mate Lowalangi. Börö daʼö, hasambalö iʼabölöʼö ita ba wanaögö ngawalö zi möi fanaisi hewaʼae ba wamaigi niha tebai tafalua ia.​—Baso Zinunö 18:29; Fil. 4:13.

Te itörö tödöda ba zi hauga abad fatua lö si tumbu Hezekieli, no iwaʼö Moze samaʼeleʼö wa fondrege zabölö Yehowa, hizaʼi omasi ia iʼogunaʼö waʼabölönia andrö ba wanolo ono mbanuania. Imane Moze, ”Lowalangi andrö nahia folumöʼö iʼotarai mböröta, ituwu ndraʼugö faoma taʼionia si lö tebulö.” (5 Mo. 33:27) Yafaduhu dödöu, na taʼodaligö Yehowa ba ginötö alua khöda gabula dödö, iʼoroʼö dangania ba wanolo yaʼita, ihaogö wamazawa, ba itolo ita wezizio enaʼö abölö.​—Hez. 37:10.