Kung minsan, nasasagad na tayo sa dami ng hamon at problema, at parang hindi na natin kaya. Pero mapapatibay tayo kung bubulay-bulayin natin ang malinaw na paglalarawan sa pangitain ni Ezekiel tungkol sa pagbabalik. Bakit? Matututuhan natin sa hulang ito na kung ang Diyos ay may kapangyarihang bumuhay ng mga buto, siguradong mabibigyan din niya tayo ng lakas na kailangan natin para makayanan ang anumang problema—kahit pa parang imposible ito para sa mga tao.​—Basahin ang Awit 18:29; Fil. 4:13.

Maaalaala natin na maraming siglo bago ang panahon ni Ezekiel, sinabi ni propeta Moises na bukod sa may kapangyarihan si Jehova, may pagnanais din siyang gamitin ang lakas niya alang-alang sa kaniyang bayan. Isinulat ni Moises: “Ang Diyos ay kanlungan mula pa nang unang panahon, nakasuporta sa iyo ang walang-hanggang mga bisig niya.” (Deut. 33:27) Kung lalapit tayo sa Diyos na Jehova kapag may problema, siguradong susuportahan niya tayo ng kaniyang mga bisig at dahan-dahan tayong aalalayan para muli tayong makatayo.​—Ezek. 37:10.