Nga zwiṅwe zwifhinga, ri nga sedzana na mitsiko na milingo ine ya ri kula nungo. Zwenezwi zwi nga ita uri zwi ri konḓele u bvela phanḓa. Fhedzi u elekanya nga bono ḽa Hesekiele ḽi ambaho nga ha u vusuluswa, zwi nga ri khwaṱhisa. Ndi ngani? Kha honovhu vhuporofita, ri nga guda uri Mudzimu ane a vha na maanḓa a u ita uri marambo o omaho a dovhe a tshile, a nga ri ṋea maanḓa uri ri kone u kunda zwithithisi, na zwine maṱoni a vhathu zwa vhonala zwi tshi nga ndi thavha.—Vhalani Phisalema 18:29; Vhafil. 4:13.

Ri songo hangwa uri musi Hesekiele a sa athu u vha hone, muporofita Mushe o amba uri Yehova u na maanḓa nahone u ṱoḓa u shumisa eneo maanḓa u itela u thusa vhathu vhawe. Mushe o ṅwala uri: “Mudzimu ndi vhukhudo hau u bva zwifhingani zwa kale, zwanḓa zwawe zwi dzula zwo u takula.” (Dot. 33:27) Na riṋe ri nga vha na vhungoho ha uri arali ra rabela Yehova Mudzimu washu musi ro tsikeledzea, u ḓo ri takusa, a ri thusa ra dovha ra ima nga milenzhe.—Hesek. 37:10.