Sa Ezekiel kapitulo 23, mababasa ta an makulog na pagkondenar sa banwaan nin Diyos huli sa saindang pagigin bakong maimbod. Dakul an pagkakapareho kan kapitulong ini sa kapitulo 16. Arog kan mas nainot na mensahe sa kapitulo 16, ginamit man sa kapitulo 23 an ilustrasyon manungod sa prostitusyon. Sa ilustrasyon, an Jerusalem asin Samaria magtugang; an Samaria an mas matua. Parehong ipinapahiling kan duwang kapitulo kun paano inarog kan nguhod an mas matua niyang tugang sa paggibo nin prostitusyon, pero linampasan pa kan nguhod an ginibong karatan asin imoralidad kan matua niyang tugang. Sa kapitulo 23, pinangaranan ni Jehova an magtugang: Ohola an mas matua, na nagrerepresentar sa Samaria, an kabisera kan sampulong tribong kahadian nin Israel; Oholiba an nguhod, na nagrerepresentar sa Jerusalem, an kabisera kan Juda. *—Ezek. 23:1-4.

Igwa pa nin pagkakapareho an duwang kapitulong ini. Posibleng an mga ini an pinakamahalaga: An mga hostes kan inot mga agom ni Jehova, dangan nagtraydor sinda sa saiya. Saro pa, igwang ipinapanugang paglaom. Dai direktang sinambit sa kapitulo 23 an panuga manungod sa paglaom na pagbalukat, pero may pagkakapareho iyan sa kapitulo 16 kan sabihon ni Jehova: “Tatapuson ko an malaswa mong paggawi asin an saimong paghohostes.”—Ezek. 16:16, 20, 21, 37, 38, 41, 42; 23:4, 11, 22, 23, 27, 37.

Sinasabi kaidto sa satong mga publikasyon na an magtugang na si Ohola saka Oholiba mga tipikong paglaladawan kan Kakristiyanuhan, partikular na kan mga relihiyon na Katoliko asin Protestante. Alagad, huli sa urog pang paghurop-hurop na may pagpamibi asin sa dugang pang pagsiyasat, igwang nagbangon na nakakapaisip na mga hapot. Masasabi daw na an Kakristiyanuhan nagin agom ni Jehova? Nakipagtipan daw sa saiya si Jehova? Malinaw na dai. Dai pa ngani nag-eeksister an Kakristiyanuhan kan magin tagapangultanan si Jesus kan “bagong tipan” sa espirituwal na Israel; an Kakristiyanuhan dai man nagin kabtang kan espirituwal na nasyon na iyan nin linahidan na mga Kristiyano. (Jer. 31:31; Luc. 22:20) Haloy nang gadan an mga apostol kan maglataw an Kakristiyanuhan. Nagpuon ining mag-eksister kan ikaapat na siglo C.E. bilang sarong apostata saka maraot na organisasyon na kompuwesto kan “mga duot”—imitasyon na mga Kristiyano—na sinambit sa propesiya ni Jesus manungod sa trigo asin duot.—Mat. 13:24-30.

Ini pa an pagkakaiba: Nagtao si Jehova nin paglaom na babalukaton niya an bakong maimbod na Jerusalem asin Samaria. (Ezek. 16:41, 42, 53-55) An Bibliya daw nagtatao man kan arog kaiyan na paglaom para sa Kakristiyanuhan? Dai! Mayo na ining paglaom arog kan iba pang kabtang kan Dakulang Babilonya.

Kaya si Ohola saka Oholiba bakong mga tipikong paglaladawan kan Kakristiyanuhan. Alagad, an pag-eksister ninda nakakatabang para masabutan an sarong mas mahalagang bagay: kun ano an sabuot ni Jehova sa mga nagbibiribid kan katotoohan manungod sa saiyang banal na pangaran asin sa saiyang mga pamantayan sa dalisay na pagsamba. An Kakristiyanuhan urog nang may pagkakasala manungod digdi huling hinihingako kan dakul na simbahan kaini na irinerepresentar ninda an Diyos na sinasabi kan Bibliya. Urog pa diyan, hinihingako ninda na an saindang lider iyo si Jesu-Cristo, an namumutan na Aki ni Jehova. Pero an ginigibo ninda sarungat sa paghihingakong iyan; itinutukdo ninda na si Jesus kabtang nin Trinidad, asin dai ninda sinusunod an malinaw niyang pagbuot na magdanay na “bakong kabtang kan kinaban.” (Juan 15:19) Paagi sa padagos na pakikikabtang sa idolatriya asin sa pulitika, pinapatunayan kan Kakristiyanuhan na talagang kabtang siya kan “maimpluwensiyang hostes.” (Kap. 17:1) Siguradong aakuon niya man an paghukom na ipapaabot sa pambilog na kinaban na imperyo nin palsong relihiyon!