Ti nora katuuaaeaia ae kammaraki ana aomata te Atua n Etekiera mwakoro 23 ibukin aia aki kakaonimaki. A bati baika titeboo iai te mwakoro aei ma mwakoro 16. N aron ae oti n te rongorongo are mai mwaina, e kabonganaaki naba te kaikonaki ni mwakoro 23 ibukin te mwakuri ni kakabooaki. E taekinaki bwa Ierutarem boni karimwin Tamaria. A kaotaki ni mwakoro aikai aron te karimwi ni kakairi iroun tarina n te mwakuri ni kakabooaki, ma e a buakaka riki are te karimwi. Ni mwakoro 23 ao e arania taari aika uoman aikai Iehova: Oora bon te karimoa ae Tamaria, ae kautun te tautaeka n uea ni baronga ake tebwina ae Iteraera, ao Ooriba bon te karimwi ae Ierutarem ae kautun Iuta. *​—Etek. 23:​1-4.

Iai riki baika a titeboo iai mwakoro aika uoua aikai. Tao aikai aika moan te kakawaki riki: A riki moa bwa kaanga buun Iehova aine aika kakabooaki aikai, ma imwina a a babakanikawaia. Iai naba te kantaninga ae raoiroi iai. E aki bati ni kaotaki kantaningaan ae a na manga rairaki ni mwakoro 23, ma titeboo ma mwakoro 16 n ana taeka Iehova are kangai: “N na karokoa n tokina aroarom ae kamwara, ao kakabooakim ibukin te wene ni bure.”​—Etek. 16:​16, 20, 21, 37, 38, 41, 42; 23:​4, 11, 22, 23, 27, 37.

Rimoa ao e taekinaki n ara boki bwa taari aika Oora ma Ooriba, a bon tei ibukin te Botaki n Aro ake aongkoa Kristian, ae iai te iraraure iai i marenan te Aro ni Katorika ao ni Boretetanti. Ma tataroakinana riki ao te kakaae iai e a tia ni karioi titiraki tabeua. Te koaua bwa te botaki n Aro ake aongkoa Kristian e a tia n riki bwa buun Iehova n te taina? Iai ana berita neiei ae e karaoia ma Iehova? Bon tiaki buuna ao akea aia berita. Bon akea te botaki aei ngke e riki Iesu bwa te tia raoi n “te berita ae boou” ma te Iteraera n taamnei, ao tiaki naba kaain te natannaomata n taamnei ake kaaina Kristian aika kabiraki. (Ier. 31:31; Ruka 22:20) E a tibwa kaoti te botaki aei imwini mateia abotoro. E moana kaotina n te kaaua n tienture C.E. bwa te tia tannako man te koaua, ae te botaki ae kamangaongao ae kaaina “titania” ake Kristian ni kewe, ake e taekinia Iesu n ana taetae ni burabeti ibukin te uita ao te titania.​—Mat. 13:​24-30.

Te kaokoro ae kakawaki naba: E anga Iehova te kantaninga ae a na manga rairaki Ierutarem ma Tamaria ake a aki kakaonimaki. (Etek. 16:​41, 42, 53-55) Iai n te Baibara te kantaninga ae aekakin aei ibukin te botaki n Aro ake aongkoa Kristian? Akea! Bon titeboo tokina ma tokini Baburon ae Kakannato.

Ngaia are Oora ao Ooriba bon tiaki kaikonakan te botaki n Aro ake aongkoa Kristian. Ma e buokira taekaia ni kaotaira i aon te bae kakawaki riki, ae ana namakin Iehova irouia naake a kamangaoa arana ae tabu ma ana kaetieti ibukin te taromauri ae itiaki. E bukinaki te botaki n Aro ake aongkoa Kristian n aei, ibukina bwa a taku ana Aro nako bwa a tei ibukin te Atua are taekinaki n te Baibara. Ao riki a taku bwa aia tia kairiri Iesu Kristo are Natin Iehova ae tangiraki irouna. Ma a a manga kaaitarai aia taeka ngke a kaotia bwa Iesu bon te Temanna n Teniman, ao ngke a aki ongeaba n ana tua ae teretere are a na “aki arona aroia kaain te aonnaba.” (Ioa. 15:19) E a kakoauaaki raoi man imanonona ni kairekerekea ma taromauriani bouannanti ao te waaki n tautaeka, bwa boni ngaia naba iteran “te kabekaau are kakannato.” (TeKao. 17:1) E na boni kamaunaaki naba n aron ae e na kamaunaaki naba te botaki n Aro ae kewe ae katobibia te aonnaba!