Ezekiele kapu 23 ke tubila ndola ya ngolo yina Nzambi pesaka bansadi na yandi sambu bo kondaka kwikama. Mambu mingi ya kele na kapu yai ke wakana ti yina kele na kapu 16. Bonso mambu ya kele na kapu 16, kapu 23 ke tubila mpi kindumba ya kifwani. Yo ke tuba nde Yeruzalemi kele leke ya nkento mpi Samaria kele yaya na yandi ya nkento. Bakapu yai zole ke tubila mutindu leke yai ya nkento landaka kindumba ya yaya na yandi mpi mutindu yandi salaka mambi mpi mansoni kuluta yaya na yandi. Na kapu 23, Yehowa ke tubila bazina ya bampangi-bankento yai zole: Ohola kele yaya, disongidila Samaria nto-mbanza ya kimfumu ya makanda kumi ya Izraele; Oholiba kele leke ya nkento, disongidila Yeruzalemi nto-mbanza ya Yuda. *—Ezek. 23:1-4.

Bakapu yai zole kele diaka ti mambu ya nkaka ya ke wakana. Ziku mambu ya kuluta mfunu yo yai: Bankento ya ndumba vandaka ntete bankento ya Yehowa mpi na nima, bo yambulaka yandi. Diaka, yo kele ti lusilu mosi ya ke pesa kivuvu. Kapu 23 ke tubila ve na pwelele kivuvu ya ke monisa nde mambu ta toma, kansi yo ke tubila mambu ya ke wakana ti mambu yai ya Yehowa ke tuba na kapu 16: “Mono ta sukisa mambu na nge ya nsoni mpi kindumba na nge.”—Ezek. 16:16, 20, 21, 37, 38, 41, 42; 23:4, 11, 22, 23, 27, 37.

Na ntangu ya ntama, mikanda na beto vandaka kutuba nde bampangi-bankento yai zole, Ohola ti Oholiba kele bizuzi ya ke monisa mabundu ya Kikristu mpi mutindu yo kabwanaka mpi yo basisaka dibundu ya Katolika mpi ya Misioni. Kansi, kuyindulula ya masonga mpi bansosa ya mbote basisaka bangiufula ya nkaka ya mfunu. Keti mabundu ya Kikristu me vandaka ntete nkento ya Yehowa na mutindu mosi buna? Keti yo me salaka ntete kuwakana ti yandi? Ata fioti ve. Mabundu ya Kikristu vandaka ve ntangu Yezu salaka “kuwakana ya mpa” ti Izraele ya kimpeve; yo me vandaka mpi ntete ve na kati ya dikanda ya kimpeve ya kele ti Bakristu yina bo me tulaka mafuta. (Yer. 31:31; Luka 22:20) Mabundu ya Kikristu kangukaka na nima ya lufwa ya bantumwa. Yo yantikaka na mvu-nkama ya iya T.B.; kimvuka yai ya kubeba mpi ya bantu yina kolamaka kele “matiti ya mbi,” disongidila Bakristu ya luvunu, yina Yezu tubilaka na mbikudulu na yandi ya ble mpi ya matiti ya mbi.—Mat. 13:24-30.

Luswaswanu ya nkaka ya mfunu yo yai: Yehowa pesaka kivuvu ya kutomisa diaka mambu na Yeruzalemi mpi na Samaria yina kondaka kwikama. (Ezek. 16:41, 42, 53-55) Keti Biblia ke pesa mabundu ya Kikristu kivuvu ya mutindu mosi? Ve! Mabundu ya Kikristu mpi mabundu yonso ya Babilone ya Nene ke vandaka ve ti kivuvu yai.

Yo yina Ohola mpi Oholiba kele ve bizuzi ya ke monisa mabundu ya Kikristu. Kansi, Ohola ti Oholiba ke sadisa beto na kubakisa diambu yai ya mfunu kibeni: mutindu Yehowa ke tadilaka bantu yina ke vwezaka zina na yandi ya santu mpi bansiku na yandi ya lusambu ya bunkete. Mabundu ya Kikristu ke nataka kizitu yai ya nene sambu yo ke tubaka nde bo kele bansadi ya Nzambi yina kele munkwa ya Biblia. Diaka, yo ke tubaka nde Yezu Kristu, Mwana yina Yehowa ke zolaka mingi, kele mfumu na bo. Kansi, malongi na bo ke wakanaka ve ti mambu yina bo ke tubaka, mu mbandu bo ke longaka butatu busantu mpi bo ke lemfukaka ve na nsiku ya kuvanda “ve bantu ya nsi-ntoto.” (Yoa. 15:19) Sambu mabundu ya Kikristu ke landa na kudikotisa na lusambu ya biteki mpi na mambu ya politiki, yo me monisaka kibeni nde yo kele kitini ya “nkento ya nene ya ndumba.” (Kus. 17:1) Yo yina, yo ta baka kibeni ndola yina bo ta pesa kimvuka ya mabundu ya luvunu ya ntoto ya mvimba!