Mu kitango 23 kya buku wa Ezikyo, muji byambo bya luzhachisho Lesa byo aambijile bantu banji babujile bukishinka. Biji mu kino kitango bipasha bingi nabiji mu kitango 16. Byonkatu byaamba kitango 16, kitango 23 nakyo kyaamba pa bupite mu kifwanyikizho. Yelusalema bamulumbulula kuba’mba wajinga nkasanji Samaliya. Abino bitango byonse bibiji byamwesha’mba nkasa walondejile bupite bwa kolojanji, bino aye wakizhizhemo kuba bupite ne kubula bumvu. Mu kitango 23, Yehoba watumbile mazhina bano bankasa ne kolo babakazhi babiji, kolojanji amba Ohola, ko kuba’mba Samaliya, muzhi mukatampe mu bufumu bwa mikoka jikumi bwa bena Isalela: Oholiba ye nkasanji, ye Yelusalema, muzhi mukatampe mu Yuda. *—Ezi. 23:1-4.

Mu bino bitango bibiji muji bintu byavula bipasha. Bino byakilamo kunema ke bino: Bano bapite bajinga nobe basongolwa kwi Yehoba, bino bamusatukijile kulutwe. Kabiji mu bino bitango byonse bibiji muji mulaye wibalengejile kwikala na luketekelo. Kitango 23 kechi kyaambishapo pa kwibapokolola ne, bino muji byambo byaambile Yehoba biji ne mu kitango 16 bya kuba’mba, “Nkakulekesha kuba bintu bya bumvu ne bupite.”—Ezi. 16:16, 20, 21, 37, 38, 41, 42; 23:4, 11, 22, 23, 27, 37.

Mu myaka ya kunyuma, mabuku etu alumbululanga bano bankasa ne kolo, ba Ohola ne Oholiba amba mu bungauzhi bemenako Kilishitendomu muji Bakatolika ne machechi akwabotu. Nangwa byonkabyo, kulombapo ne kukebakeba bulongo bishinka kwitulengela kutaana mikumbu ya ano mepuzho anema bingi. Nanchi Kilishitendomu wajingapo nobe mukazhi kwi Yehoba nyi? Nanchi wajingapo mu lulayañano ne Yehoba nyi? Ine. Kilishitendomu kechi wajingako kimye Yesu kyo alayañene “lulayañano lupya” na bena Isalela ba ku mupashi, ko kuba’mba bena Kilishitu bashingwa ne. (Yele. 31:31; Luka 22:20) Kilishitendomu waishile kwikalako batumwa bonse byo bafwile. Waikeleko mu myaka kitota kya buna, jo jibumba jasatukile jajinga nobe “nseku,” ko kuba’mba bena Kilishitu babubela, bonka baambilepo Yesu mu bungauzhi bwaamba pa wichi ne nseku.—Mat. 13:24-30.

Lupusano lukwabo lujipo, Yehoba walayile kulekelako mambo bena Isalela babujile bukishinka, ko kuba’mba bena Yelusalema ne bena Samaliya. (Ezi. 16:41, 42, 53-55) Nanchi Baibolo waambapo’mba Kilishitendomu bakamulekelako mambo nyi? Ine! Kilishitendomu kechi bakamulekelako mambo ne, byonkatu byo bakabula kulekelako mambo bupopweshi bonse buji mu Babilona Mukatampe.

Ohola ne Oholiba kechi bemenako Kilishitendomu mu bungauzhi ne. Bino betulengela kuyuka kintu kyanema bingi, Yehoba byo omvwa kutama ku muchima na bantu boba mwenga jizhina janji jazhila babula kulondela mizhilo ya bupopweshi bwanji bwa kine. Kilishitendomu wakilamo kuzhatwa, mambo machechi avula ajimo abepekezha kwimenako Lesa wa kine mwina Baibolo. Kabiji kyakilamo kutama, bamba’mba Yesu Kilishitu Mwana wa Lesa ye ntangi wabo. Pano bino babepa mambo bamba’mba Yesu uji mu balesa basatu kabiji kechi bakookela mukambizho wanji wakanya “kwikala ba pano pa ntanda” ne. (Yoa. 15:19) Na mambo a kuba Kilishitendomu upopwela bankishi ne kwivwanga mu bya bumulwilantanda, kyokyo aikela lubaji lukatampe lwa “pite mukatampe.” (Lum. 17:1) Kwa kubula nangwa kuzhinaukatu ne, naye bakamonauna pamo na bupopweshi bwa bubela bonse buji pano pa ntanda.