Yehezekele 23 udi uleja muvua bantu ba Nzambi bapile bua dipanga diabu dia lulamatu. Nshapita eu udi upetangana mu malu a bungi ne wa 16, bualu udi pende wakula bua bundumba bua mu tshimfuanyi. Nshapita ibidi eyi idi ileja ne: Yelushalema uvua muakunyi wa Samalea; ileja kabidi muvua muakunyi mulonde yayende mu bundumba kadi mulue yeye kumupita mu dienda masandi ne mu dienza dia malu makuabu mabi. Mu nshapita wa 23, Yehowa udi utela mêna a bana ba bakaji abu: Ohola ke mukulumpe, uvua uleja Samalea tshimenga tshikulu tshia bukalenge bua Isalele bua bisa dikumi; ne muakunyende Oholiba uvua yeye uleja Yelushalema tshimenga tshikulu tshia Yuda. *​—Yeh. 23:1-4.

Nshapita ibidi eyi idi ne malu makuabu adi apetangana. Pamuapa malu manene adimu nguowu aa: bandumba abu bavua kumpala bakaji ba Yehowa kadi balue kumuela mâyi ku makasa. Nshapita wa 23 udi ufila kabidi ditekemena bualu udi uleja mu tshikoso muvua Yehowa ne bua kulua kubasungila bu bobu mua kushintuluka, bipetangana ne tshivuaye muambe mu wa 16 tshia ne: “Nentuishe tshikadilu tshiebe tshia bundu ne bundumba buebe . . . ku ndekelu.”​—Yeh. 16:16, 20, 21, 37, 38, 41, 42; 23:4, 11, 22, 23, 27, 37.

Ku kale, mikanda yetu ivua ileja ne: bana ba bakaji babidi abu, Ohola ne Oholiba bavua baleja bitendelelu bionso bia bukua buena Kristo bidi bilamate malongesha a tshitendelelu tshia Katolike anyi a tshia Mishonyi. Kadi patudi basambile ne bakebulule bikole, tuvua badiele imue nkonko. Tshilejilu, bitendelelu bia bukua buena Kristo bivuaku mu ngumvuilu kampanda mukaji wa Yehowa anyi? Yehowa uvua mudie nabi tshipungidi anyi? Tòo. Bitendelelu abi kabivuaku pavua Yezu mudie “tshipungidi tshipiatshipia” ne Isalele wa mu nyuma to; ne biobi bine kabivua munkatshi mua bena Kristo bavuabu bele manyi bavua benza Isalele wa mu nyuma au to. (Yel. 31:31; Luka 22:20) Bitendelelu abi biakalua kuledibua anu panyima pa lufu lua bapostolo. Biakatuadija ne butontolodi mu bidimu bia 400 P.Y. Biobi ke bivua bienza “lupela” anyi bena Kristo ba ku dîna bavua Yezu muakuile mu mêyi ende a buprofete a blé ne lupela.​—Mat. 13:24-30.

Bualu bukuabu, Yehowa uvua mulaye bua kulua kusungila bena mu Yelushalema ne Samalea bavua bapange lulamatu. (Yeh. 16:41, 42, 53-55) Kadi Yehowa mmulayaku bitendelelu bia bukua buena Kristo bualu bua nunku mu Bible anyi? Tòo! Kabiena ne ditekemena nansha dikese, anu mudibi kabidi bua bitendelelu bikuabu bia Babilona munene.

Nunku Ohola ne Oholiba kabena baleja bitendelelu bia bukua buena Kristo to. Kadi dikalaku diabu didi dituambuluisha bua kumanya bualu bua mushinga ebu: mudi Yehowa umvua bua bantu badi banyanga dîna diende dia tshijila ne mikenji yende ya ntendelelu mukezuke. Bitendelelu bia bukua buena Kristo mbipile bualu bena mu bitanda biabi ba bungi badi bamba mudibu baleji mpala ba Nzambi muena Bible. Bamba kabidi mudi Yezu Kristo Muana munanga wa Yehowa mulombodi wabu. Kadi malu adibu benza adi abengangana ne bidibu bamba, tshilejilu, badi bamba mudi Yezu tshitupa tshia busatu bunsantu ne babenga kutumikila dîyi diende dituma dia kubenga ‘kuikala ba pa buloba.’ (Yone 15:19) Bu mudibi bitungunuka ne kutendelela mpingu ne kubuelakana mu malu a tshididi, mbileje mudibi menemene tshitupa tshia “ndumba munene.” (Buak. 17:1) Kakuyi mpata, nebipete kabutu ka musangu umue kadi kindile bitendelelu bionso bia dishima bia pa buloba bujima!