Mumukanda waEzekele kapetulu 23 mwatwama mujimbu uze Kalunga ahuhumwine vatu jenyi vakuhona kushishika. Mukapetulu kana vasonekamo vyuma vyakulifwana navize vasoneka mukapetulu 16. Ngana mwamujimbu uze vasoneka mukapetulu 16, namukapetulu 23 mwatwama mujimbu wamapwevo vachifwanyisa vaze valingilenga ujila wachifwanyisa. Yelusalema vayivuluka ngwavo songo yaSamaliya. Tupetulu vosena vavali vasolola omu Yelusalema yaputukile kulinga ujila hakulondezeza Samaliya, oloze kutwala muze yahambakanyine naSamaliya muvilinga vyakuhuka namuujila. Mukapetulu 23 mukiko vasolola omu Yehova alukile ava vasongo namukulwane majina, wamukulwane apwile ikiye Ohola chipwe ngwetu Samaliya yize yapwile nganda yayinene yawangana waIsalele wamiyachi likumi. Kaha wakanyike apwile ikiye Oholiva chipwe ngwetu Yelusalema, nganda yayinene yaYuta. *—Ezeke. 23:1-4.

Ava tupetulu vavali vatwama nawa namijimbu yikwavo yakulifwana. Mijimbu yimwe shina yize yavuluka nge, ava vaka-kulinga ujila chatete vapwile mapwevo jaYehova vachifwanyisa kaha kutwala muze vahonene kushishika. Mwatwama nawa mujimbu walutalililo. Mukapetulu 16 vahanjikamo chikuma vyakwivwila vatu jaYehova keke, oloze mukapetulu 23 kavahanjikamo hatoma vyakuvevwila kekeko. Yehova ahanjika kaha ngwenyi: “Nangukakumisa vilinga vyove vyaunyengwe naujila wove.”—Ezeke. 16:16, 20, 21, 37, 38, 41, 42; 23:4, 11, 22, 23, 27, 37.

Kunyima mikanda yetu yalumbunwinenga ngwayo, Ohola naOholiva vemanyinyineko mazavu avali avaka-Kulishitendomu, Katolika namauka aze afumine muKatolika vavuluka ngwavo Polotesitati. Oloze jino kweseka nakulomba nakuhehwojola hachihande kana, chinanehe vihula vyavivulu. Vihula vimwe shina, uno Kulishitendomu yapwile pwevo lyaYehova wachifwanyisa kunyima tahi? Kutala alikashile chivwasano naYehova tahi? Nduma. Kulishitendomu kayapwileko omu Yesu alikashile “lushiko lwaluhya” navaIsalele vakushipilitu, kaha nawa kayapwile muyachi wakushipilitu wavaka-Kulishitu vawavisako. (Yele. 31:31; Luka 22:20) Kulishitendomu yejile nakupwako hanyima yakufwa chavaposetolo. Yaputukile kupwako mulikulukaji lyamyaka lyakusokesa 4 C.E. Aha hakiko aputukilile mauka avaka-Kulishitu vamakuli vavuluka ngwavo “mwila” vaze avulukile Yesu muupolofweto uze ahanjikile kutalisa kutiliku namwila.—Mateu 13:24-30.

Chihandwa chikwavo chatwama hali vaze mapwevo vachifwanyisa naKulishitendomu shina echi: Yehova afwelelesele Yelusalema naSamaliya vakuhona kushishika ngwenyi mwakavakonekela. (Ezeke. 16:41, 42, 53-55) Kutala Mbimbiliya yafwelelesa Kulishitendomu vyuma vyovimwe tahi? Chiku. Kaveshi kukayikonekelako ngana muze kaveshi kukakonekela vosena vaze vatwama muMbavilone Yayineneko.

Shikaho Ohola naOholiva kavemanyinako Kulishitendomuko. Oloze mujimbu wava mapwevo watukafwa tutachikize chishina chachilemu. Chishina kana shina chakuvuluka omu Yehova eji kwivwanga havatu vaze veji kupihisanga lijina lyenyi nakuhona kukavangiza jindongi jenyi jize jasakiwa mukulemesa chamuchano. Kwitava chaKulishitendomu chatwama namulonga waunene chikuma, mwomwo jichachi josena jaKulishitendomu jalivuluka ngwajo jeji kwimanyinako Yehova Kalunga. Jeji kuhanjikanga nawa ngwajo Yesu Kulishitu ikiye twamina yavo. Oloze vafwelela ngwavo Yesu apwa chihanda chatulunga vatatu, kaha nawa kaveshi kukavangiza lushimbi lwaYesu lwakuhona kupwa muli ‘vaka-kayeko.’ (Yowa. 15:19) Hakuwana nge jichachi jaKulishitendomu josena jeji kulemesanga makombelo nakukundwiza mapolitiki, shikaho atamo kumulavila hali “pwevo muka-kulinga ujila chikuma.” (Kuso. 17:1) Chikupu vene nayikiye atamo kumunongesa ngana muze navakanongesa kwitava chamakuli chamukaye kosena.