Esahlukweni sama-23 sencwadi kaHezekiyeli sifumana ukusolwa okukhulu kwabantu bakaZimu ngebanga lokungathembeki kwabo. Isahlukwesi sifana nesahluko se-16 ngeendlela ezinengi. Njengomlayezo wekuthomeni, isahluko sama-23 sisebenzisa umfanekiso wobungwadla. ISamariya ngudadwabo omkhulu weJerusalema. Zombili izahlukwezi zitjengisa indlela umntazana omncani alandela ngayo ikambo kadadwabo omdala ngokungwadla kodwana yena wenza ngokudluleleko ebukhohlakalini nekuziphatheni okumbi. Esahlukweni sama-23, uJehova unikela abodadwaba amagama, u-Ohola ngomdala, okuyiSamariya ihlokodorobho yeenkoro ezilitjhumi zombuso wakwa-Israyeli, u-Oholiba ngomncani okuliJerusalema ihlokodorobho yakwaJuda. a—Hez. 23:1-4.

Izahluko ezimbilezi kunokhunye godu ezifana ngakho. Mhlamunye eziqakatheke khulu ngilezi: Iingwadlezi zithoma ngokuba bafazi bakaJehova kuthi ngemva kwalokho zimjikele. Kubuye kube nesithembiso sokuba nethemba. Isahluko sama-23 sinikela ithemba elincani lokutjhuguluka kodwana sikhambisana nesahluko se-16 lokha uJehova nakathi: “Ngizokuqeda ukuziphatha kwakho okunyenyisako nobungwadla bakho.”—Hez. 16:16, 20, 21, 37, 38, 41, 42; 23:4, 11, 22, 23, 27, 37.

Eenkhathini ezidlulileko, incwadi zethu bezithi abodadwaba ababili u-Ohola no-Oholiba, bafanekisela lobuKholwa elihlukaniseke phakathi kwaba maKatolika namaProthestani. Nanyana kunjalo, ukucabangisisa, uthandaza nokwenza irhubhululo kwenze kwaba nemibuzo. Kghani lobuKholwa khelaba mfazi kaJehova ngomqondo othileko? Khelaba sesivumelwaneni naye? Kuyakhanya ukuthi akhenge. LobuKholwa belingakarhabi ukuba khona ngesikhathi uJesu enza “isivumelwano esitjha” no-Israyeli ongokomfanekiso begodu lobuKholwa belingasiyingcenye yesitjhaba esingokomfanekiso samaKrestu azesiweko. (Jor. 31:31; Luk. 22:20) LobuKholwa akhenge libe khona bekwaba ngemva kokuhlongakala kwabapostoli. Lathoma ukuba khona ngekhulu lesine C.E. njengesihlubuki, ihlangano ekhohlakeleko eyenziwe ‘ngekhula,’ okumaKrestu angasiwo wamambala, lawo uJesu akhuluma ngawo esiphorofidweni sakhe sekoroyi nekhula.—Mat. 13:24-30.

Omunye umehluko oyihloko phakathi kwabodadwaba ababili kukuthi uJehova wanikela iSamariya neJerusalema elingakathembeki ithemba lokutjhuguluka. (Hez. 16:41, 42, 53-55) Inga-kghani iBhayibheli linethemba elifanako ngelobuKholwa? Awa, alinalo ithemba njengalo loke iBhabhiloni eliKhulu.

Nje-ke, u-Ohola no-Oholiba abafanekiseli lobuKholwa. Nanyana kunjalo, ukuba khona kwabo kuveza iqiniso eliqakathekileko lokuthi uJehova uzizwa njani ngalabo abalijamela kumbi igama lakhe elicwengileko neenkambiso zakhe zokulotjha okuhlwengileko. LobuKholwa linomlandu omkhulu endabeni le, ngebanga lokuthi amasontwalo amanengi athi ajamela uZimu oseBhayibhelini. Ngaphezu kwalokho, athi uJesu Krestu, iNdodana kaZimu ethandekako, mrholabo. Kodwana aphikisana nalokho ngokuthi athi uJesu uyingcenye yeenhloko ezintathu begodu amasonto la, akawulaleli umyalwakhe okhanyako othi ‘singabi yingcenye yephasi.’ (Jwa. 15:19) Ngokuragela phambili lilotjha iinthombe nangokuzibandakanya kwezepolotiki, lobuKholwa liveze ukuthi liyingcenye ‘yengwadla ekulu.’ (IsAm. 17:1) Siyaqiniseka ukuthi kufuze lifumane isahlulelo esifanako nesombuso wephasi wekolo yamala!