O loo taʻua i le Esekielu mataupu e 23 le faasalaga ogaoga o tagata lē faamaoni o le Atua. E tele vala e tutusa ai lenei mataupu ma le mataupu e 16. O loo taʻua foʻi i le mataupu e 23 le talafaatusa i ni fafine talitane. O loo taʻua ai o Ierusalema le uso laʻitiiti, a o Samaria le uso matua. O loo taʻua i nei mataupu e lua le mulimuli atu o le uso laʻitiiti i faiga faatalitane a lona uso matua, ae na iʻu ina sili atu ona amioleaga le uso laʻitiiti. I le mataupu e 23, na faaigoa e Ieova le uso matua iā Aola, o Samaria lea, le laumua o le malo o ituaiga e sefulu o Isaraelu; a o Aolipa le uso laʻitiiti, o Ierusalema le laumua o Iuta. *—Eseki. 23:1-4.

E iai isi vala e tutusa ai nei mataupu e lua. Ae atonu o vala nei e sili ona matilatila: O nei fafine talitane na avea muamua ma avā a Ieova, ae mulimuli ane lē faamaoni iā te ia. E lē gata i lea, e iai se folafolaga mo se faamoemoe. E lē o matuā auʻiliʻili mai i le mataupu e 23 le faamoemoe mo se laveaʻiga, ae e tutusa ma le mataupu e 16 i le fetalaiga a Ieova: “O le a ou faamutaina au amioga matagā, ma au faiga faatalitane.”—Eseki. 16:16, 20, 21, 37, 38, 41, 42; 23:4, 11, 22, 23, 27, 37.

I le taimi ua teʻa, sa taʻua ai i a tatou lomiga o lenei ʻauso o Aola ma Aolipa, ua faaata faavaloaga mai ai lotu ua faapea mai o Kerisiano, aemaise ona vaega autū e lua o le Katoliko ma le Porotesano. Peitaʻi, o tatalo ma isi saʻiliʻiliga māeʻaeʻa, na lāgā ai nisi o fesili tāua. Pe e iai se taimi na avea ai lotu ua faapea mai o Kerisiano ma avā a Ieova? Pe na iai se feagaiga i le vā o ia ma Ieova? E leai. E leʻi iai lotu ua faapea mai o Kerisiano, ina ua osia e Iesu le “feagaiga fou” ma le Isaraelu faaleagaga. E leʻi iai foʻi se taimi na avea ai lotu ua faapea mai o Kerisiano, ma vaega o lenā nuu faaleagaga, o Kerisiano faauuina. (Iere. 31:31; Luka 22:20) Ua leva ona maliliu le ʻauaposetolo ae faatoʻā aliaʻe mai lotu ua faapea mai o Kerisiano. Na amata mai nei lotu i le senituri lona fā T.A., ina ua latou liliuese mai i le upu moni ma avea ma Kerisiano faatagāfai po o “vao leaga,” i le valoaga a Iesu e faatatau i saito ma vao leaga.—Mata. 13:24-30.

O se isi eseesega tele lenei: Na folafola atu e Ieova le faamoemoe o le laveaʻiga mo aai lē faamaoni o Ierusalema ma Samaria. (Eseki. 16:41, 42, 53-55) Po o folafola mai i le Tusi Paia se faamoemoe faapena mo lotu ua faapea mai o Kerisiano? E leai! E leai se faamoemoe mo i latou e pei lava o isi lotu uma o Papelonia le Aai Tele.

O lea, e lē o faaata faavaloaga mai e Aola ma Aolipa lotu ua faapea mai o Kerisiano. Peitaʻi, ua faailoa mai ai se isi vala e sili atu ona tāua: o faalogona ia o Ieova i ē e taʻuleaga ai lona suafa paia, ma ana tapulaa mo le tapuaʻiga mamā. E matuā nofosala lotu ua faapea mai o Kerisiano i lenei mea, auā o le tele o a latou lotu o loo taʻua ai le Atua o le Tusi Paia. E lē gata i lea e latou te faapea mai o lo latou taʻitaʻi o Iesu Keriso, le Alo pele o Ieova. E feteenaʻi lenā manatu ma a latou aʻoaʻoga e faapea, o Iesu o se vaega o le tolutasi, faapea lo latou solia o le faatonuga manino ia aua neʻi avea i latou ma vaega “o le lalolagi.” (Ioa. 15:19) O le aafia pea o lotu ua faapea mai o Kerisiano i ifoga tupua ma faiga faapolotiki, ua avea ai i latou ma vaega o “le fafine talitane sili.” (Faaa. 17:1) O le mea moni, e tatau ona oo foʻi iā i latou le iʻuga ua folafola mai mo le emepaea o lotu sesē uma o le lalolagi.