KuHezekeli sehluko 23 sitfola emavi lanemandla lamelene nebantfu baNkulunkulu ngenca yekungetsembeki kwabo. Lesehluko sifana nesehluko 16 ngetindlela letinyenti. Njengalomlayeto wekucala, sehluko 23 naso sisebentisa umfanekiso webugwadla. IJerusalema kutsiwa ngusisi lomncane kantsi iSamariya kutsiwa ngusisi weJerusalema lomdzala. Totimbili letehluko tikhombisa indlela losisi lomncane lalingisa ngayo sisi wakhe lomdzala ngebugwadla, kodvwa wabese uyamendlula ngebubi nangekutiphatsa kabi. Esehlukweni 23, Jehova uniketa labosisi lababili emagama: Lomdzala ngu-Ohola, lokuyiSamariya, inhlokodolobha yembuso wetive letilishumi waka-Israyeli; kantsi lomncane ngu-Oholibha, lokuyiJerusalema, inhlokodolobha yakaJuda. *—Hez. 23:1-4.

Kunalokunye futsi letifana ngako letehluko letimbili. Mhlawumbe lokubaluleke kakhulu ngunaku: Letingwadla tacale taba bafati baJehova futsi ngekuhamba kwesikhatsi tamphingela. Ngetulu kwaloko, kunesetsembiso lesiniketa litsemba. Kusehluko 23 aliveli ngalokucacile lelitsemba lekukhululwa, kodvwa lesehluko siyafana nesehluko 16 lapho khona Jehova atsi: “Ngitakucedza nya lokutiphatsa kwakho lokwenyanyekako nalobugwadla bakho.”—Hez. 16:16, 20, 21, 37, 38, 41, 42; 23:4, 11, 22, 23, 27, 37.

Ekucaleni, tincwadzi tetfu betitsi labosisi lababili, lokungu-Ohola na-Oholibha bamelela Tinkholo Letitsi TebuKhristu futsi bamelela emacembu lamabili, lokuyinkholo yemaKatolika neyemaPhrotestani. Nobe kunjalo, kuyicabangisisa ngemthantazo lendzaba kanye nekucwaninga kuphakamise leminye imibuto. Tinkholo Letitsi TebuKhristu take taba ngumfati waJehova yini ngemcondvo lotsite? Take taba nesivumelwane yini naye? Cha. Tinkholo Letitsi TebuKhristu betingakabi khona ngesikhatsi Jesu acalisa “sivumelwane lesisha” na-Israyeli waNkulunkulu; futsi betingasiyo incenye yesive saNkulunkulu nobe emaKhristu lagcotjiwe. (Jer. 31:31; Luk. 22:20) Tinkholo Letitsi TebuKhristu tacala kuba khona ngemuva kwekufa kwebaphostoli. Tacala kuvela ngelikhulu lesine C.E. titihlubuki, nobe inhlangano lekhohlakele leyakhiwa “lukhula,” lokungemaKhristu mbumbulu, lakhuluma ngalo Jesu esiphrofethweni sakhe lesimayelana nakolo nelukhula.—Mat. 13:24-30.

Nangu lomunye umehluko lobalulekile: Jehova bekanikete iJerusalema neSamariya litsemba lekutsi utawugcine awakhululile, ngisho nobe lamadolobha bekangaketsembeki. (Hez. 16:41, 42, 53-55) LiBhayibheli litinika litsemba lelifanako yini Tinkholo Letitsi TebuKhristu? Cha! Tite litsemba, njengobe neBhabhulona Lenkhulu ite litsemba.

Ngako Ohola na-Oholibha abameleli Tinkholo Letitsi TebuKhristu. Nobe kunjalo, kuba khona kwabo kusisita sicondze nayi intfo lebaluleke kakhulu: Indlela Jehova lativa ngayo ngalabo labalimelela kabi libito lakhe lelingcwele kanye netimiso takhe tekukhonta lokuhlantekile. Tinkholo Letitsi TebuKhristu tinelicala lelikhulu kulendzaba ngobe emasontfo ato lamanyenti atitjela kutsi amelela Nkulunkulu lokukhulunywa ngaye eBhayibhelini. Ngetulu kwaloko, atitjela kutsi iNdvodzana yakhe layitsandzako, Jesu Khristu, ingumholi wawo. Noko, ayatikhohlisa njengobe atitjela kutsi Jesu uyincenye yamtsatfu-amunye futsi akawulaleli umyalo wakhe locacile wekuhlale angasiyo “incenye yelive.” (Joh. 15:19) Ngekuchubeka titihlanganisa netithico kanye netepoliki, Tinkholo Letitsi TebuKhristu tikhombise ngalokucacile kutsi tiyincenye ‘yengwadla lenkhulu.’ (Semb. 17:1) Ngaphandle kwekungabata, nato kufanele tiphele ngendlela umbuso welive wenkholo yemanga lotawuphela ngayo!