Sho tanaka lo Ɛzɛkiyɛlɛ 23 woho wakaanyema ekambi wa Nzambi la wolo tshɛ l’ɔtɛ wakiwɔ komonga la kɔlamelo. Lo toho efula, awui wele lo tshapita nyɛ fɔnaka la wanɛ wele lo tshapita 16. L’ɛnyɛlɔ ka losango la ntondo lɔsɔ, tshapita 23 kambaka la ɛnyɛlɔ ka kinumba. Jɛrusalɛma mbelamɛka oko kose aki Samariya la womoto, ndo Samariya oko enondo ande la womoto. Totshapita takɔ tohende mɛnyaka woho wakayele kose lokolo l’enondo ande la kinumba ndo woho wakandayoleka enondo ande l’akambo wa kɔlɔ ndo wa mindo. Lo tshapita 23, Jehowa mbɔlɛka akadiyɔ ahende asɔ nkombo nyɛ: Ohola mbele enondo, mbuta ate Samariya laki kapitalɛ ka diolelo dia Isariyɛlɛ dia waoho dikumi, ndo Oholiba mbele kose, mbuta ate Jɛrusalɛma kapitalɛ ka Juda. *​—Ɛzk. 23:1-4.

Totshapita takɔ tohende fɔnaka nto lo awui akina efula. Ondo dui dialeka totshapita tɔsɔ mfɔna diɔ nɛ: Waa numba shɔ wakatatɛ oko wadi wa Jehowa ko oma laasɔ vɔ ndjoshisha kɔlamelo le nde. Dui dikina nto ko daka diasha elongamelo. Tshapita 23 haleke ntɛkɛta hwe dikambo dia elongamelo k’etshungwelo, koko yɔ fɔnaka la tshapita 16 etena kakate Jehowa ɔnɛ: “Dimi layokumiya lɔkɛwɔ layɛ la nsɔnyi ndo kinumba kayɛ.”​—Ɛzk. 16:16, 20, 21, 37, 38, 41, 42; 23:4, 11, 22, 23, 27, 37.

Lo nshi yakete, ekanda aso wakataka ɔnɛ wamato ahende w’otema ɔtɔi asɔ, mbuta ate Ohola la Oholiba wekɔ lo ndjela prɔfɛsiya didjidji dia Lokristokristo kaamɛ ndo woho wokahanyemilɔ lam’asa mbetawɔ k’aseka Mupɛ ndo k’ase Asɔnyi. Koko, ekanelo ka yimba l’ekimanyielo k’alɔmbɛlɔ ndo eyangelo wa lotshimola amboyonyiya ambola amɔtshi w’ohomba. Onde Lokristokristo lambongaka lo yɛdikɔ mɔtshi wadi aki Jehowa? Onde lɔ lambodjaka la nde sheke? Mɛnamaka hwe dia ndooko. Lokristokristo komonga etena kaki Yeso ompakemi wa “sheke y’oyoyo” la Isariyɛlɛ wa lo nyuma, ndo Lokristokristo atongaka etenyi kɛmɔtshi ka wodja wa lo nyuma ɔsɔ w’Akristo w’akitami. (Jɛr. 31:31; Luka 22:20) Lokristokristo lakayongaka l’ɔkɔngɔ wa nyɔi k’apɔstɔlɔ. Lɔ lakayotatɛ monga lo ntambe ka nɛi T.D. oko ɔpɔsta, okongamelo wa kɔlɔ wakakengama la “nkangaka,” mbuta ate Akristo wa kashi wa lo prɔfɛsiya ka Yeso kendana la eponga la nkangaka.​—Mat. 13:24-30.

Otshikitanu okina w’ohomba vɔ ɔnɛ: Jehowa akasha Jɛrusalɛma ndo Samariya waki komonga la kɔlamelo elongamelo k’etshungwelo. (Ɛzk. 16:41, 42, 53-55) Onde Bible mbishaka Lokristokristo elongamelo ka ngasɔ? Ndooko! Lokristokristo bu nto l’elongamelo oko wele etenyi kekina ka Babilɔna ka Woke bu la tɔ.

Ɔnkɔnɛ, Ohola ndo Oholiba bu didjidji dia prɔfɛsiya dia Lokristokristo. Koko, vɔ tokimanyiyaka dia sho nshihodia dui di’ohomba nɛ: woho wayaoka Jehowa lo dikambo dia wanɛ walanya lokombo lande l’ekila ndo atɔndɔ ande wendana l’ɔtɛmwɛlɔ wa pudipudi. Lokristokristo mbele djekoleko l’onongo wa dikambo sɔ, nɛ dia ɛtɛmwɛlɔ alɔ efula funaka dia wekɔ enyimpala wa Nzambi ka lo Bible. Kɛnɛ koleki tshɛ ele, vɔ funaka dia Yeso Kristo ɔna Jehowa la ngandji mbele ɔnɔmbɔdi awɔ. Koko vɔ wekɔ lo mɔnyɔla kɛnɛ kafunawɔ kɛsɔ lo mbɔsa Yeso oko etenyi kɛmɔtshi ka lo nzambi ɔtɔi kele l’ɛtɛ esato ndo lo ntona nkitanyiya didjango diande diokɛma hwe diaha monga “ase andja ɔnɛ.” (Jni. 15:19) Lo ntetemala ndjasha l’ɔtɛmwɛlɔ wa dikishi ndo l’awui wa pɔlitikɛ, Lokristokristo ambɛnya dia lɔ lekɔ mɛtɛ etenyi kɛmɔtshi ka “numba ka lokolokolo.” (Ɛny. 17:1) Aha la taamu, kɛnɛ kayokomɛ tshunda dia l’andja w’otondo di’ɛtɛmwɛlɔ wa kashi mbayokomɛ ndo Lokristokristo!