Mu chaputara 23 cha Ezekiyeli, Chiuta wakasuska ŵanthu ŵake chifukwa cha kuchita vinthu mwambura kugomezgeka. Uthenga uwo uli mu chaputara ichi ukuyanako na uwo uli mu chaputara 16. Nga ni chaputara 16, chaputara 23 nacho chikuyowoya chiyelezgero cha hule. Yerusalemu wakuyowoyeka kuti ni muchoko ndipo Samariya ni mulara. Machaputara ghose ghaŵiri ghakuyowoya umo muchoko wakambira uhule pakutolera mukuru wake, kweniso kuti wakajumphizga kuchita viheni na uzaghali. Mu chaputara 23, Yehova wakaŵapa mazina ŵanakazi ŵaŵiri aŵa: Mulara Ohola, kung’anamura Samariya, msumba ukuru wa ufumu wa mafuko 10 wa Israyeli; muchoko Oholiba, kung’anamura Yerusalemu, msumba ukuru wa Yuda. a—Ezek. 23:1-4.

Paliso vinyake ivyo vikuyanako mu machaputara ghaŵiri agha. Vyakumanyikwa chomene ni ivi: Pakwamba mahule agha ghakaŵa muwoli wa Yehova, kweni ghakamwendera mphiska. Machaputara agha ghaliso na uthenga wa chigomezgo. Chaputara 23 chikupeleka chigomezgo chichoko waka, kweni chikuyanako na chaputara 16 pa fundo iyo Yehova wakayowoya kuti: “Nizamumazga nkharo yako yakulengeska na uhule wako.”—Ezek. 16:16, 20, 21, 37, 38, 41, 42; 23:4, 11, 22, 23, 27, 37.

Kale mabuku ghithu ghakatenge ŵanakazi ŵaŵiri aŵa, Ohola na Oholiba, ŵakwimira Chikhristu chautesi chakugaŵikana pakati pa Ŵakatolika na Ŵapulotesitanti. Tati talomba na kupenjerezga, tawona kuti pakuŵaso mafumbo ghanyake. Kasi Chikhristu chautesi chili kuŵapo muwoli wa Yehova? Kasi chili kuŵapo mu phangano na iyo? Yayi. Chifukwa wuli? Chikhristu chautesi kukaŵavya apo Yesu wakachitanga “phangano liphya” na Israyeli wauzimu. Nakuti Chikhristu ichi chindaŵepo mu mtundu wauzimu wa Ŵakhristu ŵakuphakazgika. (Yer. 31:31; Luka 22:20) Chikhristu chautesi chikamba pamanyuma pakuti ŵapositole wose ŵafwa. Chikamba m’ma 300 C.E nga ni gulu lakugaluka kweniso lakunangika lakupangika na “duru,” kung’anamura Ŵakhristu zina pera, ilo Yesu wakayowoya mu uchimi wake wa tirigu na duru.—Mat. 13:24-30.

Mphambano yinyake yikuru njakuti: Yehova wakapeleka chigomezgo kwa Yerusalemu na Samariya chakuti wazamuŵawombora. (Ezek. 16:41, 42, 53-55) Kasi Baibolo likupelekapo chigomezgo chanthena ichi ku Chikhristu chautesi? Yayi. Palije chigomezgo chilichose kwa Chikhristu chautesi na magulu ghanyake ghose gha Babuloni Mukuru.

Ntheura Ohola na Oholiba ŵakwimira Chikhristu chautesi yayi. Kweni ŵanakazi ŵaŵiri aŵa ŵakutovwira kuti tipulikiske umo Yehova wakuwonera awo ŵakufipiska zina lake lituŵa na kusulako fundo zake za kusopa kutuŵa. Chikhristu chautesi chili na mulandu wapadera pa nkhani iyi chifukwa matchalitchi ghake ghanandi ghakuti ghakwimira Chiuta wa mu Baibolo. Chinyake ntchakuti iwo ŵakuti Yesu Khristu, mwana wa Yehova, ni mulongozgi wawo. Kweni ŵakuteta chifukwa ŵekha ŵakuyowoyaso kuti Yesu njumoza wa ŵachiuta ŵatatu kweniso ŵakupulikira yayi dango lakuti Ŵakhristu ŵaleke kuŵa ku “chigaŵa cha charu.” (Yoh. 15:19) Chikhristu chautesi chikusopa vikozgo kweniso chikutemwa kunjilirapo pa ndyali, ntheura chalongora kuti ntchigaŵa cha “muhule mukuru.” (Chivu. 17:1) Mwambura kukayika, nacho chizamuparanyikira lumoza na visopa vinyake vyose vyautesi.