Li ta kapitulo 23 ta Esekiele te ta xal li tsatsal mantal laj yichʼ akʼbel li steklumal Dios ta skoj ti muʼyuk tukʼ laj yakʼ sbae. Li ta kapitulo liʼe xkoʼolaj tajek kʼuchaʼal li kapitulo 16. Ta xchibal li kapituloe jaʼ onoʼox ta xalbe skʼoplal li jchonbail antse. Te chal ti Jerusalene jaʼ li mukile, yan li Samariae jaʼ li vixile. Ta xchibal li kapituloe chakʼ ta ilel ti mukile jaʼ la xchanbe li xvixe, ta tsʼakale mas to lik xchon sba kʼuchaʼal li xvixe. Li ta kapitulo 23 te ta xal Jeova kʼusi sbitak li tsebetike: li Oolae jaʼ li vixile ti jaʼ skʼoplal li Samariae, li kapital yuʼun li ajvalilal ta Israele ti jaʼ li lajunvokʼ nitilulale. Yan li Oolibae jaʼ li mukile ti jaʼ skʼoplal li Jerusalene, li kapital yuʼun li ajvalilal ta Judae (Esek. 23:1-4). *

Oy to yan kʼusi xkoʼolaj-o li chib kapituloe. Yikʼaluk van jaʼ mas tsotsik skʼoplal. Li vaʼ antsetike jaʼ toʼox yajniltak Jeova, ta tsʼakale mukul satiat xchiʼuk lik xchon sbaik. Li ta chib loʼiletike chal ti oy kʼusi lek chkʼot ta pasele. Li ta kapitulo 23 muʼyuk jamal chichʼ akʼel ta ilel mi chichʼ akʼel ta perton. Yan li ta kapitulo 16 chal ti tanae. Pe li ta xchibal li kapituloe, li Jeovae chal ti chakʼbe slajeb ti chchon sba li steklumale (Esek. 16:16, 20, 21, 37, 38, 41, 42; 23:4, 11, 22, 23, 27, 37).

Ta voʼnee, li jvuntike ta xal ti Oola xchiʼuk Oolibae jaʼ toʼox skʼoplal li buchʼutik skuyoj sbaik ta yajtsʼaklomtak Kristoe. Jnopojtik toʼox ti jaʼ skʼoplal li relijion katolika xchiʼuk li relijion protestantee. Pe laj yichʼ pasel orasion xchiʼuk laj yichʼ chanbel mas skʼoplal, vaʼun xi kʼot ta nopele: «Li buchʼutik tskuy sbaik ta yajtsʼaklomtak Kristoe, ¿mi kʼot onoʼox van ta yajnil li Jeovae? ¿Mi la spasik trato xchiʼuk li Jeovae?». Muʼyuk. Yuʼun kʼalal kʼot ta jkʼopojel sventa ‹achʼ trato› xchiʼuk li Israel ta mantal li Jesuse, chʼabalik toʼox li buchʼutik skuyoj sbaik ta yajtsʼaklom Kristoe xchiʼuk muʼyuk te skʼoplalik xchiʼuk li buchʼutik tʼujbil chbatik ta vinajele (Jer. 31:31; Luk. 22:20). Li buchʼutik tskuy sbaik ta yajtsʼaklom Kristoe, jaʼ to lik kʼalal jal xa ox slajelik li jtakboletike, yuʼun jaʼ te lik ta xchanibal siglo xchiʼuk jaʼik jtsop jvalopatinej mantaletik ti jaʼik li ‹chopol tsʼiʼlele›. Li krixchanoetik taje jaʼik li jecheʼ yajtsʼaklomtak Kristo ti laj yalbe skʼoplal Jesus li ta lokʼolkʼop sventa trigo xchiʼuk li chopol tsʼiʼlele (Mat. 13:24-30).

Jtos ti kʼusi tsots skʼoplal skʼan jtsaktik ta ventae, laj yal ti xuʼ xakʼ ta perton li Jerusalen xchiʼuk li Samaria ti muʼyuk tukʼ laj yakʼ sbaike (Esek. 16:41, 42, 53-55). ¿Mi ta van xakʼbe spatobil yoʼonton li buchʼutik tskuy sbaik ta yajtsʼaklomtak Kristoe? ¡Muʼyuk! Yuʼun jaʼ jech chichʼik pasbel ek kʼuchaʼal li Mukʼta Babiloniae.

Jaʼ yuʼun, li Oola xchiʼuk Oolibae maʼuk skʼoplal li buchʼutik tskuy sbaik ta yajtsʼaklomtak Kristoe. Taje oy kʼusi tsots skʼoplal chakʼ jnaʼtik: ti kʼu yelan chaʼi sba Jeova ta stojolal li buchʼutik muʼyuk chichʼbeik ta mukʼ li xchʼul bie xchiʼuk ti tsyalesbeik sbalil li mantaletik ta sventa li yichʼobil ta mukʼe. Li buchʼutik tskuy sbaik ta yajtsʼaklomtak Kristoe tsots saʼoj smulik ek. Yuʼun skotol li relijionetike chalik ti jaʼ chichʼik ta mukʼ li Dios ti te chal ta Vivliae. Maʼuk noʼox, yuʼun chalik ti jaʼ jnitvanej yuʼunik li Jesukristoe ti jaʼ li skʼanbil Nichʼon Jeovae. Pe jaʼ noʼox tsloʼla sba stukik, yuʼun chalik ti Jesuse jaʼ jun Trinidad xchiʼuk muʼyuk chchʼunbeik smantal ti skʼan mu teuk skʼoplalik ta balumile (Juan 15:19). Ta skoj ti chichʼik ta mukʼ santoetik li buchʼutik tskuy sbaik ta yajtsʼaklomtak Kristoe xchiʼuk ti tstikʼ sbaik ta politikae, jamal xvinaj ti te skʼoplal li ta «jchonbail ants ti tsots sjuʼel[e]» (Apok. 17:1). Jamal xvinaj ti koʼol kʼusi chkʼot ta stojolik xchiʼuk li jecheʼ relijionetik ta spʼejel balumile.