Mababasa ha Ezekiel kapitulo 23 an mapwersa nga pagkondenar ha katawohan han Dios tungod han ira pagkadiri-maunungon. Damu an kaparihoan hito nga kapitulo ha kapitulo 16. Gin-gamit liwat han kapitulo 23 an ilustrasyon mahitungod han prostitusyon. An Jerusalem an manghod ngan an Samaria an magurang. Iginpapakita hiton duha nga kapitulo nga ginsubad han manghod an magurang ha paghostes pero nalabwan pa an iya karaotan ngan imoralidad. Ha kapitulo 23, ginngaranan ni Jehova an magbugto: Ohola an magurang, an Samaria, nga kapital han napulo-ka-tribo nga ginhadian han Israel; Oholiba an manghod, an Jerusalem, nga kapital han Juda. *​—Ezek. 23:1-4.

An duha nga kapitulo may-ada pa kaparihoan. Bangin ini an pinakamakatirigamnan: An mga hostes asawa anay ni Jehova kondi nagtraydor ha iya. May-ada liwat saad hin paglaom. Ha kapitulo 23, diri direkta nga gin-uunabi an paglaom hin pagpahiuli, pero may kaparihoan ito ha kapitulo 16 ha ginsiring ni Jehova: “Pauundangon ko an imo malaw-ay nga panggawi ngan an imo prostitusyon.”​—Ezek. 16:16, 20, 21, 37, 38, 41, 42; 23:4, 11, 22, 23, 27, 37.

Hadto, an aton mga publikasyon nagsiring nga an magbugto nga hira Ohola ngan Oholiba nagsisimbolo ha Kakristianohan nga nabahin ha Katoliko ngan Protestante nga mga relihiyon. Pero tungod han dugang nga pag-ampo ngan pagsaliksik, binangon an importante nga mga pakiana. An Kakristianohan ba nagin asawa ni Jehova? Nagkaada ba hiya kasabotan ha Iya? Klaro nga waray. Diri pa ngani naeksister an Kakristianohan han nagin tagapamutnga hi Jesus han “bag-o nga kasabotan” ha espirituwal nga Israel; an Kakristianohan waray liwat magin bahin hiton espirituwal nga nasud han dinihogan nga mga Kristiano. (Jer. 31:31; Luc. 22:20) Maiha na nga patay an mga apostol han ineksister an Kakristianohan. Nagtikang hiya han ikaupat ka siglo C.E. sugad nga apostata ngan mahugaw nga organisasyon nga ginkukompwesto han “mga banwa”​—peke nga mga Kristiano—​ha tagna ni Jesus mahitungod han trigo ngan mga banwa.​—Mat. 13:24-30.

Ini an usa pa nga daku nga kaibahan: Naghatag hi Jehova hin paglaom nga mapahiuli an diri maunungon nga Jerusalem ngan Samaria. (Ezek. 16:41, 42, 53-55) Naghatag ba an Biblia hin sugad nga paglaom ha Kakristianohan? Waray! Waray hiya paglaom pariho han iba pa nga bahin han Babilonya nga Gamhanan.

Salit hira Ohola ngan Oholiba diri nagsisimbolo ha Kakristianohan. Pero igintututdo han asoy mahitungod ha ira an mas importante nga punto: an inaabat ni Jehova ha mga nagpapasipara ha iya baraan nga ngaran ngan mga suruklan ha putli nga pagsingba. Salaan gud an Kakristianohan hini nga bahin kay an iya damu nga relihiyon nag-aangkon nga nagrirepresentar han Dios ha Biblia. Nag-aangkon liwat hira nga lider nira an hinigugma nga Anak mismo ni Jehova, hi Jesu-Kristo. Pero kabaliktaran hito an ira ginbubuhat; igintututdo nira nga hi Jesus bahin han Trinidad ngan gintatalapas nira an iya klaro nga sugo nga magpabilin nga ‘diri bahin han kalibotan.’ (Juan 15:19) Pinaagi ha padayon nga pagbuhat hin idolatriya ngan kahidabi ha mga isyu ha politika, an Kakristianohan napamatud-an nga bahin gud han “gamhanan nga hostes.” (Pah. 17:1) Sigurado nga upod hiya ha kabungkagan han imperyo han buwa nga relihiyon ha kalibotan!