Be ko ni eho lɛ, awie yɛ wɔwoji lɛ amli akɛ Yerusalem feɔ Kristendom he mfoniri. Ekã shi faŋŋ akɛ, shihilɛi gbohii ni tee nɔ yɛ Yerusalem, tamɔ amagajamɔ kɛ efɔŋfeemɔ ni fa babaoo yɛ maŋ lɛ mli lɛ kaiɔ wɔ nɔ ni yaa nɔ yɛ Kristendom ŋmɛnɛ. Shi nyɛsɛɛ nɛɛ awieee yɛ wɔwoji lɛ, ni nɔ ni okaneɔ amrɔ nɛɛ fata he lɛ amli dɔŋŋ akɛ Biblia mli sane ko feɔ nɔ ko he mfoniri, ja Biblia lɛ diɛŋtsɛ efee lɛ faŋŋ akɛ nɔ ko yɛ ni abaanyɛ adamɔ nɔ awie nakai. Ani nɔ ko yɛ Ŋmalɛ lɛ mli ni abaanyɛ adamɔ nɔ akɛɛ akɛ Yerusalem feɔ Kristendom he mfoniri? Dabi.

Susumɔ saji ni nyiɛ sɛɛ nɛɛ ahe okwɛ: Tsutsu ko lɛ, Yerusalem ji he ni akɛ jamɔ krɔŋŋ hãa Nyɔŋmɔ yɛ; sɛɛ mli lɛ, Yerusalembii lɛ batsɔmɔ jamɔkwalɔi. Shi Kristendom kɛ ehe woko jamɔ krɔŋŋ mli dã. Kɛjɛ be ni Kristendom ba shihilɛ mli yɛ afi 300 Ŋ.B. afii lɛ amli nɛɛ, amale tsɔɔmɔi sɔŋŋ etsɔɔ kɛbashi amrɔ nɛɛ.

Kɛfata he lɛ, Babilonbii lɛ kpãtã Yerusalem hiɛ, shi sɛɛ mli lɛ, Yehowa hã atswa Yerusalem maŋ lɛ ama shi ekoŋŋ kɛwo ehiɛ nyam ni abɔi anɔkwa jamɔ yɛ jɛmɛ ekoŋŋ. Shi Kristendom hiɛ bako nyam yɛ Yehowa hiɛ dã, ni kɛ́ akpãtã ehiɛ yɛ amanehulu kpeteŋkpele lɛ mli lɛ, ebaŋ shihilɛ mli dɔŋŋ.

Yɛ nɔ ni wɔsusu he kɛtsɔ hiɛ lɛ naa lɛ, te wɔbaamu sane naa wɔhã tɛŋŋ? Kɛ́ wɔpɛi Biblia mli gbalɛi ni ba mli yɛ Yerusalem ni yeee anɔkwa lɛ nɔ lɛ amli lɛ, wɔbaanyɛ wɔkɛɛ akɛ, ‘Enɛ tamɔ nɔ ni wɔnaa yɛ Kristendom ŋmɛnɛ lɛ nɔŋŋ.’ Shi etamɔ nɔ ni nɔ ko bɛ Ŋmalɛ lɛ mli ni wɔbaanyɛ wɔdamɔ nɔ wɔkɛɛ akɛ Yerusalem feɔ Kristendom he mfoniri.