To dai, owe mítọn lẹ nọ dọ dọ Jelusalẹm atẹṣitọ lọ nọtena Mẹylọhodotọklisti to yẹhiadonu-liho. E họnwun dọ, ninọmẹ he gbayipe to Jelusalẹm he ma yin nugbonọ lọ mẹ lẹ—ehe bẹ boṣiọ-sinsẹ̀n po mẹhodu he gbọn kámẹ-gòmẹ po hẹn—nọ hẹn mí flin nuhe to jijọ to sinsẹ̀n Mẹylọhodotọklisti tọn lẹ mẹ. Ṣigba to owhe agọe tọn lẹ mẹ, owe mítọn lẹ kakajẹ dehe hia a te ehe ji, masọ nọ dohia dọ nude nọtena nudevo to dọdai-liho ba, adavo eyin dodonu he họnwun de tin to Biblu mẹ nado wàmọ. Be dodonu dolido de tin to Owe-wiwe mẹ nado dọ dọ Jelusalẹm nọtena Mẹylọhodotọklisti to yẹhiadonu-liho ya? Lala.

Lẹnnupọndo nuhe bọdego lẹ ji: To ojlẹ de mẹ wayi, Jelusalẹm yin ahọnkan sinsẹ̀n-bibasi wiwe-ṣeke tọn; amọ́ to nukọn mẹ mẹhe to otò lọ mẹ lẹ lẹzun atẹṣitọ. To vogbingbọn mẹ, hagbẹ Mẹylọhodotọklisti tọn lẹ ma tindo mahẹ to sinsẹ̀n-bibasi wiwe-ṣeke mẹ pọ́n gbede. Sọn whenue gbọ́n Mẹylọhodotọklisti yin didoai to owhe kanweko ẹnẹtọ W.M., sinsẹ̀n-nuplọnmẹ lalo lẹ janwẹ e nọ plọnmẹ.

Humọ, to whenue Jelusalẹm ko yin vivasudo gbọn Babilọninu lẹ dali godo, Jehovah vọ́ nukundagbe etọn dohia tòdaho lọ bọ e sọ lẹzun ahọnkan sinsẹ̀n-bibasi nugbo tọn whladopo dogọ. To alọ devo mẹ, Mẹylọhodotọklisti ma ko mọ nukundagbe Jiwheyẹwhe tọn yí pọ́n gbede, podọ to whenue e na yin vivasudo to nukunbibia daho lọ whenu, e ma nasọ gọwá aimẹ gbede ba.

Po nuhe mí dọ wayi lẹ po, tadona tẹ kọ̀n wẹ mí gán wá? Eyin mí to dogbapọnna dọdai Biblu tọn he ko mọ hẹndi gando Jelusalẹm atẹṣitọ lọ go lẹ, mí gán nọ mọdọ, ‘Ehe sọgbe pẹpẹ hẹ nuhe mí nọ mọ to sinsẹ̀n Mẹylọhodotọklisti tọn lẹ mẹ to egbehe.’ Ṣigba, e taidi dọ dodonu depope ma tin to Owe-wiwe mẹ nado dọ dọ Jelusalẹm nọtena Mẹylọhodotọklisti to yẹhiadonu-liho.