Ibagbaga idi dagiti publikasiontayo a ti Kakristianuan ti antitipiko ti apostata a Jerusalem. Dagiti kasasaad iti di matalek a Jerusalem—agraman ti idolatria ken ti nasaknap a kinadakes—sigurado nga ipalagipda kadatayo ti mapaspasamak iti Kakristianuan. Ngem iti nabiit pay, dagiti publikasiontayo, agraman daytoy a libro a basbasaem, dina inusar ti tipiko ken antitipiko a pamay-an ti panangilawlawag iti padto malaksid kadagiti teksto iti Biblia a mangted iti nalawag a pangibasaran iti kasta a panangilawlawag. Adda kadi natibker a pangibasaran iti Biblia a mangipakita a ti Kakristianuan ti antitipiko a Jerusalem? Awan.

Usigenyo dagitoy: Ti Jerusalem idi ti sentro ti nadalus a panagdaydayaw; idi agangay, pinanawan dagiti umilina ti pudno a panagdaydayaw. Ngem ti Kakristianuan ket saan a pulos nangipaay iti nadalus a panagdaydayaw. Sipud iti panangrugina idi maikapat a siglo C.E., ulbod a doktrina ti kanayon nga isursuro ti Kakristianuan.

Maysa pay, kalpasan a dinadael dagiti Babilonio ti Jerusalem, pinaboran manen ni Jehova ti siudad ken nagbalin manen a sentro ti pudno a panagdaydayaw. Ngem ti Kakristianuan ket saan a pulos pinaboran ti Dios, ken inton madadael bayat ti dakkel a rigat, saanen a pulos maisubli.

Maibasar kadagita, ania ti konklusiontayo? No usigentayo dagiti padto ti Biblia a natungpal iti di matalek a Jerusalem, mabalin a kunatayo, ‘Kapada daytoy ti makitkitatayo iti Kakristianuan ita.’ Ngem nalawag nga awan ti pangibasarantayo iti Biblia a ti Kakristianuan ti antitipiko a Jerusalem.