Tene mabuku maitũ marataaragĩria atĩ ndini iria ciĩĩtaga cia Gĩkristiano nĩcio irũgamĩrĩirũo nĩ Jerusalemu ĩrĩa yaregenyũkĩte. Hatarĩ nganja maũndũ matarĩ ma wĩhokeku marĩa maarĩ thĩinĩ wa Jerusalemu ta ũhoi mĩhianano na ungumania mũingĩ nĩ matũririkanagia maũndũ marĩa marekĩka thĩinĩ wa ndini icio. No mĩaka-inĩ ya ica ikuhĩ, mabuku maitũ, nginya rĩrĩ ũrathoma, matitaaragĩria ũrathi na njĩra ya ũndũ ũrĩ kĩĩruru kana ũkĩrũgamĩrĩra ũndũ ũngĩ ũgooka tiga harĩa Bibilia yonanĩtie wega gĩtũmi gĩa gwĩka ũguo. Hihi nĩ harĩ gĩtũmi kĩiganu gĩa Kĩĩmandĩko gĩa kuuga atĩ ndini iria ciĩĩtaga cia Gĩkristiano nĩcio irũgamĩrĩirũo nĩ Jerusalemu? Aca.

Ta wĩcirie maũndũ maya: Nĩ kũrĩ hĩndĩ Jerusalemu kwarĩ na ũthathaiya mũtheru; thutha-inĩ, aikari a kuo nĩ maatuĩkire aregenyũki. Ngũrani na ũguo, gũtirĩ hĩndĩ ndini iria ciĩĩtaga cia Gĩkristiano irĩ ciakorũo na ũthathaiya mũtheru. Kuuma rĩrĩa ciaambĩrĩirie hĩndĩ ya karine ya kana Mahinda Maitũ, ndini icio ikoretwo ikĩrutana morutani ma maheeni hĩndĩ ciothe.

Makĩria ma ũguo, thutha wa Jerusalemu kwanangwo nĩ Ababuloni, Jehova nĩ aacokire gwĩtĩkĩra itũũra rĩu, na ũthathaiya wa ma ũgĩcoka kuo o rĩngĩ. No gũtirĩ hĩndĩ ndini iria ciĩĩtaga cia Gĩkristiano irĩ cietĩkĩrĩka nĩ Ngai, na rĩrĩa ikaaniinwo hĩndĩ ya thĩna ũrĩa mũnene, itigaacoka kuoneka rĩngĩ.

Nĩ ũndũ ũcio-rĩ, tũngiuga atĩa? Rĩrĩa twathuthuria morathi ma Bibilia marĩa maahingire harĩ Jerusalemu nĩ ũndũ wa kwaga wĩhokeku, twahota kuuga ũũ, ‘Ũndũ ũyũ ũratũririkania maũndũ marĩa tuonaga thĩinĩ wa ndini iria ciĩĩtaga cia Gĩkristiano ũmũthĩ.’ No kũroneka atĩ gũtirĩ na gĩtũmi gĩa Kĩĩmandĩko gĩa kuuga atĩ ndini iria ciĩĩtaga cia Gĩkristiano nĩcio irũgamĩrĩirũo nĩ Jerusalemu.