Mafuku kunyuma, mabuku etu adi anena’mba bipwilo bya kine Kidishitu i muneneno wa kyelekejo ufunkila pa Yelusalema mupondoke. Ngikadilo yādi mu Yelusalema wampikwa kikōkeji​—kubadila’mo ne butōtyi bwa bilezaleza ne bilongwa bibi byādi bizambalele konso-konso​—na bubine bituvuluja bintu bilongeka mu bipwilo bya kine Kidishitu. Inoko, mu ino myaka, mabuku etu, kubadila’mo ne dino dyotanga’di, keakingidijangapo bintu bya kala amba bidi na nshintulwilo ya bupolofeto ya mu mafuku a kumeso, poso’nka popa padi bubinga bwa mu Bible bwa patōkelela bwa kulongela namino. Lelo kudi bubinga bupotoloke bwa mu Bisonekwa bwa kunenena’mba bipwilo bya kine Kidishitu i muneneno wa kyelekejo ufunkila pa Yelusalema? Aa.

Tala ino myanda: Yelusalema wāikele kyaba kimo bu kitako kya butōtyi butōka; ino, mwenda mafuku bekadi bandi bāalamuka ke batupondo. Inoko, bipwilo bya kine Kidishitu kebyatōtele nansha dimo butōtyi butōka. Tamba kwikala’ko kwabyo mu myaka ya katwa ka buná Y.M., bipwilo bya kine Kidishitu bifundijanga nyeke mfundijo ya bubela.

Kadi, Yelusalema pa kupwa konakanibwa na bene Babiloni, Yehova wāmwitabije monka, wāikala monka bu kitako kya butōtyi bwa bine. Inoko, kashā bipwilo bya kine Kidishitu kebyaitabijibwe na Leza, kadi shi bibaonakanibwa pa kyamalwa kikatampe, kebikekala’kopo monka.

Kukwatañana na byapwa kala kunenwa, le tubwanya kufula ku kunena bika? Kitatyi kyotubandaula bupolofeto bwa mu Bible bwāfikidile pa Yelusalema wampikwa kikōkeji, tubwanya kunena’mba, ‘Bino bituvuluja bintu byotumonanga mu bipwilo bya kine Kidishitu dyalelo.’ Inoko i kimweke amba kekudipo bubinga bwa mu Bisonekwa bulombola’mba bipwilo bya kine Kidishitu i muneneno wa kyelekejo ufunkila pa Yelusalema.