Kunyima mikanda yetu yahanjikilenga ngwayo, vatu vamuYelusalema vaze valikangile kuli Kalunga vemanyinako Kulishitendomu. Vyuma vyavipi valingilenga muYelusalema vyakufwana nge, kulemesa tuponya navilinga vyakuhenga vili nakutwanukisa vyuma vinakusoloka muKulishitendomu. Oloze mumyaka yakalinwomu, mikanda yetu kuhakilako nauno vene muli nakutanga kayeshi jino nakuhanjika havyuma vyakufwana ngana hakulumbununa upolofwetoko, kuvanga kaha haze Mbimbiliya yinasolola ngocho. Kutala Visoneka vyahana unjiho wakusolola nge Yelusalema yemanyinako Kulishitendomu tahi? Nduma.

Tushimutwilenu havyakutalilaho: Hakavanga Yelusalema yapwile chihela chakulemesela Kalunga wamuchano, kutwala muze vatu vamunganda kana valikangile kuli Kalunga. Oloze Kulishitendomu kanda yikundwizengaho lyehi kulemesa chamuchano. Kufuma vene mulikulukaji lyamyaka lyakusokesa 4 C.E., Kulishitendomu yinanangulanga lika vyuma vyamakuli.

Kaha nawa omu Yelusalema vayinongesele kuli vaka-Mbavilone, Yehova evwililile keke yize nganda nakuyitungulula nakupwa cheka chihela chenyi chakumulemeselaho. Oloze Kulishitendomu kanda lyehi vayivwileho keke kuli Kalunga, kahomu navakayinongesa haluyando lwalunene kayeshi kukapwako chekako.

Kweseka navyakutalilaho kana, tunahase kukukulula ngwetu ngachilihi? Nge tuli nakukekesa upolofweto wamuMbimbiliya uze wateselemo hali vatu vakuhona kushishika vamuYelusalema, tunahase kwamba ngwetu, ‘Vyuma valingilenga vikiko vili nakusoloka namuKulishitendomu makumbi ano.’ Oloze muMbimbiliya kamwatwama unjiho uze wasolola nge Yelusalema yemanyinako Kulishitendomuko.