Kudala amabhuku ethu ayesithi abantu beJerusalema abasebehlamukile bamela amasonto amanga azithi ngawesiKhristu. Kuliqiniso sibili ukuthi izinto ezazisenziwa ngabantu beJerusalema ezinjengokukhonza izithombe lobuqili ziyenzakala lasemasontweni amanga. Kodwa eminyakeni esanda kwedlula amabhuku ethu lalonaleli olibalayo khathesi kawasachasisi iziphrofetho eqamba ukuthi into ngayinye imelani ngaphandle nxa imibhalo ikuveza egcekeni lokho. Manje kulobufakazi obuseMibhalweni yini obungenza sithi iJerusalema imela amasonto amanga azithi ngawesiKhristu? Hatshi.

Cabanga ngalokhu: Abantu beJerusalema bake bakhonza uJehova ngendlela ayifunayo kodwa ngokuhamba kwesikhathi bamhlamukela. Kodwa amasonto amanga wona awakaze amkhonze uJehova ngendlela ayifunayo. Kusukela ngesikhathi esiba khona, ngeminyaka yabo-300 C.E., abelokhu efundisa amanga ngoNkulunkulu.

Kanti njalo ngemva kweminyaka iJerusalema ibhujiswe ngabaseBhabhiloni, uJehova waphinda walivuselela idolobho leli wabuyisana labantu bakhe, baqalisa ukumkhonza ngendlela eqondileyo. Kodwa amasonto amanga wona awakaze amukelwe nguNkulunkulu futhi azabhujiswa ngesikhathi sokuhlupheka okukhulu, angaphindi abekhona.

Ngakho singaphetha ngokuthini? Lanxa iziphrofetho ezagcwaliseka ebantwini beJerusalema ababengathembekanga zisikhumbuza okwenziwa ngamasonto amanga azithi ngawesiKhristu, akulabufakazi obuseBhayibhilini obungenza sithi iJerusalema imela amasonto amanga.