Eenkhathini ezidlulileko, iincwadi zethu bezithi lobuKholwa lijamele iJerusalema elahlubukako. Ukungathembeki kweJerusalema, okufaka hlangana ukulotjhwa kweenthombe nokukhwabanisa kusikhumbuza okwenzeka kwelobuKholwa. Nanyana kunjalo, eminyakeni yamva nje, iincwadi zethu okufaka hlangana nale oyifundako nje, akhenge zitjho bona isiphorofido esithileko sijameleni ngaphandle kwalokha iBhayibheli nayiveza ibanga lalokho. Inga-kghani likhona ibanga elingokomTlolo elisenza sithi lobuKholwa lijamele iJerusalema? Awa.

Cabanga ngokulandelako: IJerusalema bekuyindawo lapho ukulotjha okuhlwengileko bekwenziwa khona, kwathi ekukhambeni kwesikhathi, abahlali balo batjhuguluka baba ziinhlubuki. Ngokuhlukileko, lobuKholwa akhenge khelilotjhe uZimu ngendlela ayamukelako. Kusukela nalithomako ngekhulu lesine C.E., lobuKholwa belisolo lifundisa amala.

Ukungezelela kilokho, ngemva kobana iJerusalema litjhatjalaliswe babantu beBhabhiloni, uJehova wavuselela idorobheli begodu laba yindawo lapho ukulotjha kweqiniso kwenziwa khona. Ngakwelinye ihlangothi, lobuKholwa akhenge nakanye lifumane umusa kaZimu begodu nalitjhatjalaliswako ngesizi elikhulu, angekhe lisaba khona godu.

Nasiqala lokho, khuyini esingaphetha ngakho? Nasiqala iimphorofido zeBhayibheli ezazaliseka ngabantu beJerusalema abangakathembeki, singathi, ‘lokho kusikhumbuza ngokwenzeka kwelobuKholwa namhlanjesi.’ Kubonakala ingekho imiTlolo etjengisa bona lobuKholwa lijamele iJerusalema.