Ɛnee yɛka kɛ Kilisienemaanle ne le Gyɛlusalɛm mɔɔ kpɔkyele la anwo neazo. Awozonlezonlenlɛ nee ɛbɛlatane mɔɔ hɔle zo wɔ Gyɛlusalɛm la kakye yɛ ninyɛne mɔɔ ɛlɛkɔ zo wɔ Kilisienemaanle ne anu la kpalɛ. Noko kenlensa ye, yɛ mbuluku ne mɔ, mɔɔ buluku ɛhye boka nwo la, ɛnga kɛ ngapezo bie le debie kpole mɔɔ bara kenle bie la anwo neazo, kyesɛ Baebolo ne fa ngyinlazo wienyi mɔɔ kile zɔ la maa. Asoo debie titili bie wɔ Ngɛlɛlera ne anu mɔɔ yɛkola yɛgyinla zo yɛka kɛ Gyɛlusalɛm le Kilisienemaanle ne anwo neazo ɔ? Kyɛkyɛ.

Suzu ɛhye mɔ anwo: Ɛnee nɔhalɛ ɛzonlenlɛ kɔ zo kpalɛ wɔ Gyɛlusalɛm; nzinlii, menli ne kpɔkyele. Noko nɔhalɛ ɛzonlenlɛ ɛtɛkɔle zo ɛlɛ wɔ Kilisienemaanle ne anu. Ɔvi Kilisienemaanle ne mɔlebɛbo wɔ ɛvoya mɔɔ tɔ zo nna Y.M. too mɔɔ ba la, yehilehile adalɛ ngilehilelɛ dahuu.

Bieko, mɔɔ Babelɔnoma zɛkyele Gyɛlusalɛm la anzi, Gyihova liele suakpole ne dole nu bieko, na eza bɛzonlenle nɔhalɛ nu wɔ ɛkɛ. Noko Nyamenle ɛtɛdiele Kilisienemaanle ne ɛtɛtole nu ɛlɛ, na saa bɛsɛkye ye wɔ anwongyelelɛ kpole ne anu a, ɔnrɛdwazo bieko.

Duzu a yɛkulo kɛ yɛka a? Saa yɛneɛnlea Baebolo ngapezo mɔɔ rale nu wɔ Gyɛlusalɛm anwo zo la anu a, yɛbahola yɛaha kɛ, ‘Ɛhye le kɛ mɔɔ yɛnwu ye wɔ Kilisienemaanle ne anu ɛnɛ la.’ Noko, ɔzɔho kɛ debie biala ɛnle Ngɛlɛlera ne anu mɔɔ kile kɛ Kilisienemaanle ne le Gyɛlusalɛm anwo neazo a.