Li ta jvuntike chal toʼox ti jaʼ skʼoplalik li buchʼutik tskuy sbaik ta yajtsʼaklomtak Kristo li Jerusalen ti la svalopatinik komel Jeovae. Li kʼusitik chopol tspasik li ta jteklume tsvules ta joltik li kʼusitik tspasik li buchʼutik tskuy sbaik ta yajtsʼaklomtak Kristoe, yuʼun chichʼik ta mukʼ santoetik xchiʼuk chopol kʼusitik tspasik. Oy xa ta sjayibal jabile, li jvuntike xchiʼuk li livro liʼe maʼuk xa chalbe tajek smelolal kʼusi skʼoplal li jujun loʼile, jaʼ to jech chichʼ alel mi jamal chal li Vivliae. ¿Mi te chal ta Vivlia ti jaʼ skʼoplalik li buchʼutik tskuy sbaik ta yajtsʼaklomtak Kristo li Jerusalene? Muʼyuk.

Nopbo skʼoplal liʼe: Li ta Jerusalene jaʼ toʼox te chichʼ ichʼel ta mukʼ li melel Diose, pe ta mas tsʼakale li jnaklejetike la svalopatinik komel li Jeovae. Yan li buchʼutik tskuy sbaik ta yajtsʼaklomtak Kristoe mi jkojuk yichʼojik ta mukʼ li melel Diose. Ti kʼuxi lik talel ta xchanibal siglo li buchʼutik tskuy sbaik ta yajtsʼaklomtak Kristoe, muʼyuk onoʼox chakʼik ta chanel li kʼusi melele.

Kʼalal laj xa ox yichʼ lajesel yuʼun jbabiloniaetik li Jerusalene, lek ilat yan velta yuʼun li Jeovae xchiʼuk te lik yichʼik ta mukʼ yan velta. Pe li buchʼutik tskuy sbaik ta yajtsʼaklomtak Kristoe muʼyuk onoʼox bu lek ch-ilatik yuʼun li Jeovae xchiʼuk mi laj yichʼik lajesel li ta mukʼta tsatsal vokolile chchʼay-o skʼoplalik.

¿Kʼusi chakʼ kiltik skotol taje? Kʼalal ta jchanbetik skʼoplal li albil kʼopetik ti kʼot ta pasel li ta Jerusalen ti muʼyuk tukʼ laj yakʼ sbae, xuʼ van xi chkaltike: «Taje xkoʼolaj xchiʼuk li kʼusi tspasik avi li buchʼutik tskuy sbaik ta yajtsʼaklomtak Kristoe». Pe muʼyuk onoʼox bu chal Vivlia ti jaʼ skʼoplalik li buchʼutik tskuy sbaik ta yajtsʼaklomtak Kristo li Jerusalene.