Hadto, an aton mga literatura nag-unabi nga an Kakristianohan an antitipiko, o ginsisimbolohan, han apostata nga Jerusalem. An mga kahimtang ha diri matinumanon nga Jerusalem​—upod na an idolatriya ngan kalyap nga karaotan—​nagpapahinumdom gud ha aton han nahitatabo ha Kakristianohan. Pero hinin bag-o la nga mga tuig, an aton mga publikasyon, upod na ini nga libro, waray na maghatag hin simboliko nga kahulogan ha mga tagna labot la kon may klaro nga basihan ha Biblia. May marig-on ba nga basihan ha Kasuratan ha pagsiring nga an Kakristianohan an ginsisimbolohan han Jerusalem? Waray.

Hunahunaa ini: An Jerusalem sentro hadto han putli nga pagsingba; ha urhi, nagin apostata an mga umurukoy hito. Ha kabaliktaran, an Kakristianohan waray gud magbuhat hin putli nga pagsingba. Tikang pa han kaestablisar hito han ikaupat ka siglo C.E., an Kakristianohan pirme nagtututdo hin buwa nga doktrina.

Dugang pa, katapos bungkagon han mga taga-Babilonya an Jerusalem, gin-uyonan utro ni Jehova ito nga syudad ngan nagin sentro na liwat han tinuod nga pagsingba. Ha luyo nga bahin, an Kakristianohan waray gud uyuni han Dios, ngan kon bungkagon na ito ha daku nga kasakitan, mawawara na ito ha kadayonan.

Kon sugad, ano an aton konklusyon? Kon gin-uusisa naton an mga tagna ha Biblia nga natuman ha diri matinumanon nga Jerusalem, bangin makasiring kita, ‘Puropariho ini han aton nakikita ha Kakristianohan yana.’ Pero klaro nga waray basihan ha Kasuratan ha pagsiring nga an Kakristianohan an ginsisimbolohan han Jerusalem.