ẸKPẸTI UWUHRẸ 18A
Jihova Ọ be Vẹvẹ Ahwo Unu Kpahe Ẹmo Ologbo nọ Ọ be Tha Na
A rẹ jọ Ebaibol na ruẹ eruẹaruẹ buobu nọ a jọ vẹvẹ ahwo unu kpahe ẹmo ologbo jọ nọ Jihova ọ te rọ raha ahwo kpobi nọ a wọso iẹe gbe ahwo riẹ. Ma te jọ etenẹ na fodẹ eruẹaruẹ itieye na jọ. Muẹrohọ oghẹrẹ nọ unuovẹvẹ nana sa-sa i ro thoma. Yọ whọ te jẹ ruẹ nọ Jihova o ru rie lọhọ re ahwo-akpọ kpobi a wo uvẹ nọ a re ro yo unuovẹvẹ na re a jowọ.
OKE IZRẸL ANWAE
IZIKIẸL: “‘Me ti se ọgbọdọ ze rọsuọ [Gọg] evaọ ehru igbehru mẹ kpobi,’ ere Jihova Olori nọ Ọ Mai Kpehru na ọ ta.”—Izik. 38:18-23.
JERIMAYA: “[Jihova] ọvo o ti bruoziẹ ahwo-akpọ kpobi. Yọ ọ te rehọ ahwo omuomu na kẹ ọgbọdọ.”—Jeri. 25:31-33.
DANIẸL: “Ọghẹnẹ obọ odhiwu ọ te rehọ uvie jọ mu, onọ . . . o te guọghọ jẹ rehọ ivie nana kpobi te oba.”—Dan. 2:44.
IKPE-UDHUSOI ỌSOSUỌ C.E.
JESU: “Uye ulogbo o te jọ, utionọ o re via no emuhọ akpọ na ze he.”—Mat. 24:21, 22.
PỌL: “Jesu . . . avọ ikọ-odhiwu egaga riẹ . . . [a] te rehọ uye kẹ enọ e riẹ Ọghẹnẹ hẹ.”—2 Tẹs. 1:6-9.
PITA: “Ẹdẹ Jihova ọ te nyaze wọhọ oji, . . . a vẹ te fere otọakpọ na gbe iruo nọ e rrọ eva riẹ via.”—2 Pita 3:10.
JỌN: “Ọgbọdọ nọ ọ rrọ thethei jẹ rrọ dada u wolo no unu [Jesu] ze nọ o re ro kpe erẹwho na.”—Evia. 19:11-18.
EVAỌ OKE MAI NA
Ebaibol na họ obe nọ a mae fa jẹ mae ghale kẹ ahwo no evaọ ikuigbe ohwo-akpọ kpobi
IDIBO JIHOVA EVAỌ OKE MAI NA . . .
-
A ghale Ebaibol ima-idu buobu kẹ ahwo no evaọ evẹrẹ udhusoi buobu
-
A be rehọ euwa ima buobu ta usi uwoma kukpe kukpe
