JUKʼAMP YATJJATAÑATAKI RECUADRO 19A
Jehová Diosan bendicionanakapa
Biblian yaqhep textonakapanjja jawirampita umampitwa parli, ukanakajj Jehová Diosat jutki uka bendicionanakat parlañatakiw apnaqasi. Taqpach uka textonakajja, Jehová Diosajj kuna toqes bendisistu uk amuytʼañatakiw yanaptʼistu, ukanak yatiñajj wali chʼamañchtʼkiriwa. Ukham sasajj ¿kuna toqenakatsa parlasktanjja?
JOEL 3:18. Uka profeciajja uma jalsutwa parli, uka umajj templon santuariopat mistusajj qʼala wañsuta ‘Acacianakani valleruw qarpi’. Joel profetasa Ezequielasa kunjamsa mä jawirajj waña lugar sumaptayäna ukwa uñjapjjäna. Paypach visionanjja jawirajj Jehová Diosan templopatwa mistu.
ZACARÍAS 14:8. Zacarías profetajja Jerusalenat ‘jakañ churir uma’ mistunirwa uñjäna. Chikat umajja ‘inti jalsu toqenkir lamar qotaru’, mä arunjja Mar Muerto qotaruw saräna, mä chikat umasti ‘inti jalanta toqenkir lamar qotaru’, mä arunjja Mar Mediterráneo qotaruw sararakïna. Jerusalenajj ‘jachʼa Reyin markapänwa’, mä arunjja Jehová Diosan markapänwa (Mat. 5:35). Uka markan sutipajj Zacariasan profeciap taypinkiwa, ukhamätapajj Jehová Diosajj aka oraqjjar apnaqjjani ukwa amuytʼayistu. Zacariasajj jakañ churir umat parlki uka profeciarjamajja, khitinakatï jachʼa tʼaqesiñ tiempo jakkir pasapkani, paraison jaktapkarakini ukanakaruw Jehová Diosajj jutïrin bendisini, walja maranak nayratpachaw ukham amuytanjja.
APOCALIPSIS 22:1, 2. Apóstol Juanajja Ezequielajj uñjkäna niya ukar uñtasit mä jawirwa visionan uñjarakïna. Ukampis Juanajj uñjkäna uka jawirajja, Diosan tronopatwa mistüna, janiw templot mistkänti. Juanan visionapasa Zacariasajj uñjkäna uka visionasa, Jesusajj Waranqa Maranak apnaqkani ukhajj kuna bendicionanaksa Diosajj apanini uka toqetwa amuyatajj parli.
Jehová Diosan tronopat mistki uka jawirasa Ezequielajj visionan uñjkäna uka jawirasa, Jehová Diosan bendicionanakapawa, uka bendicionanakajj Diosat jan jitheqtiri servirinakatakiwa.
SALMO 46:4. Amuyatajja uka textojj Diosar adorañata ukhamarak Diosan gobiernopatwa parlaski. Uka textorjamajja, mä jawiraw ‘Diosan markapar’ kusisiñ api, ukajj Diosan Reinopwa amtayistu. Ukatjja jawirajj ‘jachʼa Diosan sagrado jachʼa tabernaculoparuw’ kusisiñ aparaki, ukajj Dios saparuk adorasitapwa amtayistu.
Taqe uka textonakajja, Jehová Diosajj jupat jan jitheqtiri servirinakaparojj aka pä toqetwa bendisini sasin confiyañatakiw yanaptʼistu. Maya, Diosan Reinopajj apnaqjjani ukhajj walja bendicionanakwa katoqañäni. Paya, Dios saparuk adorasjjani ukajj wal yanaptʼistani. Uka pä bendicionanakajj wiñayatakïniwa. Ukhamajj Jehová Diosampita Jesús Yoqapampit jutki uka ‘jakkir uma’ thaqañatak chʼamachasiskakiñäni, mä arunjja kunanaktï wiñay jakañ katoqañatak munasiñat jupanakajj churkistu ukanak thaqaskakiñäni (Jer. 2:13; Juan 4:10).
