APOTIN NUPINPLỌN TỌN 19A
Tọ̀sisa Dona lẹ Tọn sọn Jehovah Dè
Lẹnnupọndo kandai Biblu tọn voovo he yí hogbe lọ lẹ “tọ̀sisa” po “osin” po zan nado do lehe dona lẹ nọ sà sọn Jehovah dè do hia lẹ ji. Kandai ehelẹ to pọmẹ bẹ hogbe tulinamẹ tọn lẹ hẹn gando lehe Jehovah nọ dona mí do go. Gbọnna?
JOẸLI 3:18 Dọdai ehe dohia dọ asisa osin tọn de nọ sà sọn fiwiwe tẹmpli lọ tọn mẹ. E nọ sà jẹgbonu nado húsinna “Agbàdo [húhú] Akasia-Tin tọn lẹ.” Enẹwutu, Joẹli po Ezekiẹli po mọ bọ tọ̀sisa de hẹn nuhe to lẹdo húhú de mẹ lẹ gọwá ogbẹ̀. To whẹho awe lẹpo mẹ, tọ̀sisa lọ nọ sà sọn ohọ̀ kavi tẹmpli Jehovah tọn mẹ.
ZEKALIA 14:8 Yẹwhegán Zekalia mọ “osin ogbẹ̀ tọn” lẹ dile yé to sisà sọn tòdaho Jelusalẹm tọn mẹ. Odaa osin lọ tọn nọ sà yì ohù whèzẹtẹn-waji tọn, kavi Ohù Kúkú mẹ, podọ odaa he pò nọ sà yì ohù whèyihọ-waji tọn, kavi Ohù Meditelane tọn mẹ. Jelusalẹm wẹ yin “tòdaho Ahọlu daho lọ,” yèdọ Jehovah Jiwheyẹwhe tọn. (Mat. 5:35) Enẹwutu, nugbo lọ dọ Zekalia donù tòdaho enẹ go hẹn mí flindọ Jehovah na dugán do aigba blebu ji to sọgodo. Mí ko mọnukunnujẹemẹ sọn ojlẹ dindẹn die dọ osin he yin nùdego to dọdai ehe mẹ lẹ dohia dọ Jehovah na dona pipli voovo awe gbẹtọvi nugbonọ lẹ tọn to Paladisi mẹ, enẹ wẹ mẹhe na lùn nukunbibia daho lọ tọ́n po mẹhe na yin finfọnsọnku to enẹgodo lẹ po.
OSỌHIA 22:1, 2 Apọsteli Johanu mọ tọ̀sisa yẹhiadonu tọn de he jlo na taidi dehe Ezekiẹli mọ nkọ. Ṣigba, e ma sà sọn tẹmpli de mẹ, amọ́ sọn ofìn Jehovah tọn kọ̀n. Enẹwutu, e taidi dọ numimọ ehe, kẹdẹdi dehe zekalia mọ lọ, jlo na zinnudo dona he gandudu Jiwheyẹwhe tọn na hẹnwa to Owhe Fọtọ́n lọ gblamẹ lẹ ji.
Na nugbo tọn, vogbingbọn yẹẹ de poun wẹ tin to dona he wá sọn gandudu Jehovah tọn mẹ lẹ po dehe to numimọ tọ̀sisa tọn he Ezekiẹli mọ lọ mẹ lẹ po ṣẹnṣẹn. Dona enẹ lẹpo wẹ wá sọn Jehovah dè bo nọ sà jẹ gbẹtọvi nugbonọ lẹpo dè.
SALMU LẸ 46:4 Doayi lehe wefọ ehe kẹdẹ dọhodo adà awe lọ lẹpo ji do go—enẹ wẹ sinsẹ̀n-bibasi po gandudu po. Tofi, mí mọdọ tọ̀sisa de nọ hẹn ayajẹ wá na “tòdaho Jiwheyẹwhe tọn,” ehe to alọdlẹndo Ahọluduta po gandudu po, gọna “gòhọtúntún gigonọ wiwe Gigogán lọ tọn,” ehe to alọdlẹndo sinsẹ̀n-bibasi wiwe-ṣeke.
Kandai ehelẹ to pọmẹ hẹn mí deji dọ Jehovah na dona gbẹtọvi nugbonọ lẹ to aliho awe mẹ. Mí na mọaleyi kakadoi, tintan, gbọn gandudu etọn gblamẹ podọ, awetọ, gbọn awuwledainanu etọn na sinsẹ̀n-bibasi wiwe-ṣeke gblamẹ. Enẹwutu, mì gbọ mí ni magbe nado nọ dín “osin ogbẹ̀ tọn” lọ zọnmii—enẹ wẹ awuwledainanu owanyinọ Jehovah Jiwheyẹwhe po Visunnu etọn po tọn na ogbẹ̀ madopodo.—Jel. 2:13; Joh. 4:10.
