JOEL 3:18 Ginapakita sini nga tagna ang tuburan nga nagailig halin sa santuaryo sang templo. Nagailig ini para tubigan ang mamala nga “Nalupyakan sang mga Kahoy nga Akasya.” Gani si Joel kag si Ezequiel pareho nga may nakita nga suba nga nagahatag sing kabuhi sa mamala nga duog. Ini nga mga suba, pareho nga naghalin sa balay ukon templo ni Jehova.

ZACARIAS 14:8 Nakita ni propeta Zacarias ang “tubig sang kabuhi” nga nagailig halin sa siudad sang Jerusalem. Ang katunga pakadto sa nasidlangan nga dagat, ukon Patay nga Dagat, kag ang katunga, sa nakatundan nga dagat, ukon Dagat Mediteraneo. Ang Jerusalem amo “ang siudad sang gamhanan nga Hari,” si Jehova nga Dios. (Mat. 5:35) Gani ang pagsambit ni Zacarias sina nga siudad nagapahanumdom sa aton sang paggahom ni Jehova sa bilog nga duta sa palaabuton. Ang mga tubig sa sini nga tagna nagapakita nga pakamaayuhon ni Jehova ang duha ka grupo sang matutom nga katawhan sa Paraiso, ang makalampuwas sa dakung kapipit-an kag ang mga banhawon sa ulihi.

BUGNA 22:1, 2 Nakita ni apostol Juan ang malaragwayon nga suba nga pareho sa nakita ni Ezequiel. Pero nagahalin ini indi sa templo, kundi sa trono ni Jehova. Pareho sa palanan-awon ni Zacarias, mahimo ginapadaku man sini nga palanan-awon ang mga pagpakamaayo sang paggahom sang Dios sa tion sang Isa ka Libo ka Tuig.

Siempre, gamay lang ang kinatuhayan sang mga pagpakamaayo sa paggahom ni Jehova kag sang mga pagpakamaayo nga ginarepresentar sang suba nga nakita ni Ezequiel sa palanan-awon. Ini tanan nga pagpakamaayo halin kay Jehova kag nagailig sa tanan nga matutom nga katawhan.

SALMO 46:4 Talupangda kon paano pareho nga ginapadaku sini nga bersikulo ang pagsimba kag ang paggahom. Makita diri ang suba nga nagapasadya sa “siudad sang Dios,” buot silingon ang Ginharian kag ang paggahom, kag makita man diri “ang balaan kag daku nga tabernakulo sang Labing Mataas,” buot silingon ang putli nga pagsimba.

Sa kabilugan, ini nga mga bersikulo nagapasalig sa aton nga pakamaayuhon ni Jehova ang iya matutom nga katawhan sa duha ka paagi. Makabenepisyo kita sing wala katapusan, una, sa iya paggahom, kag ikaduha, sa iya kahimusan para sa putli nga pagsimba. Gani mangin determinado kita subong nga padayon nga magkuha kay Jehova nga Dios kag sa iya Anak sang “tubig nga nagahatag sing kabuhi”—ang ila mahigugmaon nga mga aman para sa kabuhi nga wala sing katapusan!—Jer. 2:13; Juan 4:10.