JOEL 3:18 Daytoy a padto ipakitana ti ubbog nga aggapu iti santuario ti templo. Agayus dayta a mangpadanum iti namaga a “Tanap ti Kaykayo nga Akasia.” Nakita ngarud da Joel ken Ezekiel ti karayan a mangbiag iti natikag a disso. Dagita a karayan ket agpada a naggapu iti balay wenno templo ni Jehova.

ZACARIAS 14:8 Nakita ni propeta Zacarias ti “nabiag a dandanum” a nagayus manipud iti siudad ti Jerusalem. Kagudua iti danum ti agay-ayus iti makindaya a baybay, wenno Natay a Baybay, ken kagudua ti agay-ayus iti makinlaud a baybay, wenno Baybay Mediteraneo. Ti Jerusalem “ti siudad ti naindaklan nga Ari” a ni Jehova a Dios. (Mat. 5:35) Ti panangdakamat ni Zacarias iti dayta a siudad ti mangipalagip kadatayo iti panagturayto ni Jehova iti intero a daga. Nabayagen a naawatantayo a ti kaipapanan ti danum iti daytoy a padto ket ti panangbendisionto ni Jehova iti dua a grupo dagiti matalek a tattao iti Paraiso, dagidiay makalasat iti dakkel a rigat ken dagiti mapagungar kalpasanna.

APOCALIPSIS 22:1, 2 Nakita ni apostol Juan ti simboliko a karayan a kas iti nakita ni Ezekiel. Nupay kasta, aggapu dayta iti trono ni Jehova, saan nga iti templo. Isu a dagiti bendision ti panagturay ti Dios bayat ti Sangaribu a Tawen ti agparang nga ipaganetget daytoy a sirmata, a kas iti sirmata ni Zacarias.

Siempre, bassit la ti nagdumaan dagiti bendision manipud iti panagturay ni Jehova ken dagidiay irepresentar ti karayan a nakita ni Ezekiel iti sirmata. Amin dagita a bendision ket aggapu ken Jehova ken agayus iti amin a matalek a tattao.

SALMO 46:4 Siputanyo no kasano a saklawen daytoy a bersikulo ti dua a paset—panagdaydayaw ken panagturay. Makitatayo ditoy ti maysa a karayan a mangparagsak iti “siudad ti Dios,” a mangtukoy iti Pagarian ken panagturay, ken “ti nasantuan ken naindaklan a tabernakulo ti Kangatuan,” a mangtukoy iti nadalus a panagdaydayaw.

Amin dagita a teksto ti mangipasigurado kadatayo a bendisionanto ni Jehova ti amin a matalek a tattao iti dua a pamay-an. Agnanayon a mabendisionantayo iti: umuna, gapu iti panagturayna, ken maikadua, gapu iti urnos ti nadalus a panagdaydayaw. Determinadotayo ngarud koma ita nga agtultuloy a gumun-od iti “sibibiag a danum”—dagiti naayat a probision para iti agnanayon a biag—manipud ken Jehova a Dios ken iti Anakna!—Jer. 2:13; Juan 4:10.