KAKITENGULUZHA MWALUMBULULWA BISHINKA 19A
Mikola Imenako Mapesho a Yehoba Lesa
Akilangulukai pa byepelo bimo bya mu Baibolo muji byambo bya kuba’mba “mukola” ne “mema,” kulumbulula mapesho a Yehoba. Ano mashimikila etutundaika bingi inge twiatanga mambo etulengela kuyuka Yehoba byo etupesha. Mambo ka?
YOELA 3:18 Buno bungauzhi bwaamba pa kakola kafuma mu nzubo ya Yehoba yazhila. Kabena kukonkolokela pangye na kutekezha “Kimpachiko kya Bichi bya Kaseele.” Onkao mambo, Yoela ne Ezikyo bonse bamwene kakola kaletele mema a bumi ku mpunzha kwaumine. Mu buno bonse bungauzhi, kano kakola kafuminenga mu nzubo ya Yehoba.
ZEKALIYA 14:8 Ngauzhi Zekaliya wamwene “mema a bumi” akonkolokelenga kufuma mu muzhi wa Yelusalema. Mema amo ayilenga mu kalunga ka mema ka ku musela, nangwa’mba mu Kalunga Kafwa, kabiji akwabo ayilenga mu kalunga ka mema ka ku muzhika, nangwa’mba mu Kalunga ka Meditelanya. Yelusalema wajinga “muzhi wa Mfumu mukatampe” aye Yehoba Lesa. (Mat. 5:35) Byaambile Zekaliya pa uno muzhi, bituvululamo bukalama bwa Yehoba bukakumbana pano pa ntanda ponse kulutwe na lwendo. Kufumatu ne kala, twayuka mwatala buno bungauzhi kuba’mba mema aji mu buno bungauzhi amwesha kuba’mba Yehoba ukapesha mabumba abiji a bantu bakishinka mu Paladisa, bakapuluka pa malwa akatampe ne bantu bakasangulwa.
LUMWEKESHO 22:1, 2 Mutumwa Yoano naye wamwene mukola wa kifwanyikizho wipasha na wamwenepo Ezikyo. Bino aye mukola ye amwene kechi wafumine mu nzubo ya Lesa ne, wafumine ku jitanda ja Yehoba. Onkao mambo, kino kimwesho, ne kyamwene Zekaliya byonse bibena kwamba pa mapesho a bukalama bwa Lesa antutu amo akekalako mu Myaka Kiumbi Kimo.
Nangwa kya kuba paji kano ka lupusano kacheche pa mapesho afuminenga ku bukalama bwa Yehoba na mapesho a mukola wamwene Ezikyo mu kimwesho, bino ano mapesho onse abena kufuma kwi Yehoba kabiji bantu bonse bakishinka bamwenamo.
SALAMO 46:4 Monai kino kyepelo byo kyaamba pa byonse bibiji, pa bupopweshi ne pa bukalama. Pa kino kyepelo, paji mukola walengela “muzhi wa Lesa” kusangalala, kulumbulula Bufumu ne bukalama, ne “Tente wa lusambakeno mukatampe wazhila wa Mwine Wakila,” kulumbulula bupopweshi bwa kine.
Buno bungauzhi bonse bumweshatu patoka kuba’mba Yehoba ukapesha bantu bakishinka mu mashinda abiji. Jitanshi, tukamwenamo mu bukalama bwanji myaka ne myaka. Ja bubiji, tukatwajijila kumwenamo mu lunengezho lwanji lwa bupopweshi bwa kine myaka ne myaka. Onkao mambo, twayai tutwajijile kukeba “mema a bumi” kwi Yehoba Lesa ne ku Mwananji, bintu biketulengela kwikala na bumi bwa myaka ne myaka!—Yele. 2:13; Yoa. 4:10.
