YOWELE 3:18 Ou upolofweto wasolola kaselwoke uze atuvikile muchihela chajila chatembele. Atwalile meya “muChinema chaMitondo yaMikesha” muze kamwapwile meyako. Shikaho Yowele naEzekele vamwene kalwiji uze alingishile vyuma vyapwile kuvihela vyakuhona meya viyoye. Vosena vavali vamwene kalwiji mwafuminyina kuzuvo yaYehova chipwe kutembele.

ZEKALIYA 14:8 Kapolofweto Zekaliya amwene “meya akuyoya” ali nakufuminyina munganda yaYelusalema. Chimbwa chimwe chayile kuKalungalwiji wakumututuko, chipwe ngwetu kuKalungalwiji waKufwa, kaha chimbwa chikwavo chayile kuKalungalwiji wakumulauko, chipwe ngwetu kuKalungalwiji waMendetelenya. Yelusalema yapwile “nganda yaMwangana wamunene,” Yehova Kalunga. (Mateu 5:35) Zekaliya hakuvuluka nganda kana chatwanukisa nge kulutwe Yehova mwakayula hamavu hosena. Kufuma vene kunyima tunalinangula ngwetu, meya akuyoya vavuluka muupolofweto asolola nge Yehova mwakakisula mazavu avali avatu vakushishika navakapwa muPalachise. Lizavu limwe shina lyavaze navakayovoka luyando lwalunene, kaha likwavo shina lyavaze navakasanguka.

KUSOLOKA 22:1, 2 Kaposetolo Yowano amwene kalwiji wachifwanyisa ngana uze amwene Ezekele. Oloze kalwiji vamwenesele Yowano afuminyinyine kulitanda lyaYehova keshi kutembeleko. Shikaho chakumwenesa kanechi nachize vamwenesele Zekaliya vyasolola vyuma vyamwaza mwakatulingila Yehova muchiyulo chaYesu chaMyaka 1,000.

Chipwe ngocho, vyuma vyamwaza vize tweji kunganyalanga kuchiyulo chaYehova navize tweji kunganyalanga kukalwiji uze vamwenesele Ezekele kavyalihandununa chikumako. Vyuma vyosenevi vyamwaza vyeji kufumanga kuli Yehova nakunganyalisa vangamba jenyi vakushishika.

SAMU 46:4 Muvesi kana mwasoloka nge mwatwama vyuma vivali, chiyulo nakulemesa Kalunga. Vavulukamo kalwiji uze eji kunehanga kuwahilila ‘kunganda yaKalunga,’ kulumbununa Wangana nachiyulo, kaha nawa vavulukamo “tavanaku yayinene yajila yayou Wakulitulaho Chikuma” kulumbununa kulemesa chamuchano.

Eyi mijimbu yatufwelelesa ngwayo Yehova mwakakisula vatu vakushishika mujijila jivali. Natukanganyala kuvyuma kanevi myaka yosena, chatete, natukanganyala kuchiyulo chenyi, kaha chamuchivali natukanganyala kuvyuma alongesa mukulemesa chamuchano. Shikaho tufwilenu kutambula “meya akuyoya” kuli Yehova Kalunga nakuli Mwanenyi. Meya kana emanyinako vyuma vyamwaza vize navikatulingisa tukapwe nakuyoya chahaya myaka yosena.—Yele. 2:13; Yowa. 4:10.