YOELI 3:18 Ba wamaʼeleʼö daʼa, so sambua gumbu nidanö sangele moroi ba naha niʼamoniʼö ba gosali. Mangele nidanö daʼö ba ibasöi ”Ndraso Ziti” si no oköli. Na simanö, Yoeli hegöi Hezekieli, faoma laʼila nidanö sangele si numalö ba danö soköli irege tola mowanua zauri ba daʼö. Ba zi dombua famaʼeleʼö andrö, mangele nidanö iʼotarai gosali mazui omo Yehowa.

ZAKHARIA 14:8 Oroma ba wamaʼeleʼö Zakharia wa mangele ”nidanö fangorifi” moroi ba mbanua Yeruzalema. Si matongania mangele ba nasi gatumbukha, mazui Asi si Mate, ba si matongania ba gaekhula mazui Asi Mediterania. Yeruzalema yaʼia daʼö okhöta ”Razo sebua” sotöi Lowalangi Yehowa. (Mat. 5:35) Banua Yeruzalema zamasugi ba dödöda wa mamatörö Yehowa dania ba zi sagörö ulidanö. Iʼotarai mböröta no aboto ba dödöda wa idanö sangele ba gangilata andrö zangoromaʼö wa ifahowuʼö zi dombua ngawawa si lö faröi andrö Yehowa ba Waradaiso dania, yaʼia daʼö ngawawa sauri moroi ba wamakao sabölö-bölö hegöi niha nisusugi aefa daʼö.

FAMAʼELEʼÖ 22:1, 2 Iʼila nungo nidanö sinenge sotöi Yohane si fakhili-khili ba niʼila Hezekieli. Hizaʼi, mangele nungo nidanö andrö moroi ba dadaoma Yehowa tenga moroi ba gosalinia. Simane ba wamaʼeleʼö Zakharia, angilata daʼa zamatunö khöda howu-howu moroi ba wamatörö Lowalangi sagötö zi saribu fakhe.

Tatu manö, howu-howu moroi ba wamatörö Yehowa fakhili-khili ia ba howu-howu sangele simane ungo nidanö ba gangilata Hezekieli. Moroi khö Yehowa fefu howu-howu andrö ba mangele fefu ba niha si lö faröi.

SINUNÖ 46:4 Iʼabakhaiʼö wangombakha khöda ayati daʼa sanandrösa ba wamosumange Yehowa hegöi famatörönia. So nungo nidanö sangaʼasogö faʼomuso dödö ba ”mbanua Lowalangi” yaʼia daʼö Famatörö Lowalangi hegöi lala wamatörönia, simanö göi ’nose Lowalangi niʼamoniʼö solakhömi khö Wondrege Zalawa’, yaʼia daʼö famosumange satulö.

Famaʼeleʼö daʼa zameʼe khöda faʼafaduhu dödö wa lö tebulö ifahowuʼö Yehowa nono mbanuania si lö faröi, ba so dombua lala niʼogunaʼönia. Sagötö faʼara, lö tebulö tasöndra howu-howu moroi (1) ba wamatörö Yehowa, ba (2) moroi ba gamakhoitania sanandrösa ba wamosumange satulö. Börö daʼö, datahalö gangetula ba wamadu ’idanö fangorifi’, si no ihenaigö Lowalangi Yehowa hegöi Ononia si fao faʼomasi enaʼö tasöndra waʼauri si lö aetu!​—Yer. 2:13; Yoh. 4:10.