IBHOKSI LOKUFUNDISA 19A
Imilambo Yeembusiso Ezivela KuJehova
Cabanga ngamavesi ambalwa aseBhayibhelini asebenzisa ibizo elithi “umlambo” nelithi ‘amanzi’ ukufanekisa iimbusiso ezigeleza zivela kuJehova. Nasifunda ngawo woke amavesi la, kuyasikhuthaza ukwazi indlela uJehova asibusisa ngayo. Njani?
JUWELI 3:18 Isiphorofidwesi sitjengisa umlanjana, uvela endaweni ecwengileko yethempeli. Uyageleza uthelelela “iMithi yoMunga esemRhobeni” eyomileko. Nje-ke, uJuweli noHezekiyeli babona umlambo uletha ukuphila endaweni eyomileko. Kiwo womabili amavesi la, umlambo uvela endlini kaJehova namkha ethempelini.
ZAKARIYA 14:8 Umphorofidi uZakariya ubona “amanzi wokuphila” ageleza avela edorobheni leJerusalema. Ingcenye yamanzi la igelezela elwandle elingepumalanga namkha eLwandle Elifileko, bese kuthi enye ingcenye, igelezele elwandle elingetjingalanga namkha eLwandle leMedithera. IJerusalema ‘bekulidorobho leKosi ekulu,’ uJehova uZimu. (Mat. 5:35) UZakariya nakakhuluma ngedorobho kusikhumbuza bona uJehova uzokubusa iphasi loke kungasikade. Sele kusikhathi eside sizwisisa ukuthi amanzi ekukhulunywe ngawo esiphorofidweni atjho bona uJehova uzokubusisa iinqhema ezimbili zabantu abathembekileko ePharadesi, labo ezabe basaphila ngemva kwesizi elikhulu nalabo ezabe bavuswe ekufeni.
ISAMBULO 22:1, 2 Umpostoli uJwanisi ubona umlambo ongokomfanekiso ofana naloyo owabonwa nguHezekiyeli. Nanyana kunjalo, awuveli ethempelini kunalokho uvela esihlalweni sakaJehova sobukhosi. Nje-ke umbono lo, njengaloyo owabonwa nguZakariya, ugandelela iimbusiso esizozifumana ngaphasi komBuso kaZimu hlangana nemiNyaka eyiKulungwana.
Mncani khulu umehluko okhona hlangana neembusiso ezivela kuJehova, nalezo ezifanekiselwa mlambo uHezekiyeli awubona embonweni. Zoke iimbusiswezi zivela kuJehova begodu zigelezela kibo boke abantu abathembekileko.
IRHUBO 46:4 Tjheja bona ivesi linye liziveza njani izinto ezimbili, ukulotjha nokubusa. Likhuluma ngomlambo owenza “idorobho lakaZimu” lithabe, okutjho umBuso nobukhosi ‘nethaberinakeli elikhulu elicwengileko loPhezukoke,’ okutjho ukulotjha okuhlwengileko.
Nakawoke amavesi la, asiqinisekisa ngokuthi uJehova uzokubusisa abantu abathembekileko ngeendlela ezimbili. Sizokuzuza ngokungapheliko, kokuthoma, embuswenakhe begodu kwesibili, emalungiselelweni wokulotjha okuhlwengileko. Nje-ke asihlaleni sizimisela ukubawa uJehova uZimu neNdodanakhe “amanzi wokuphila,” okusisipho sethando sokuphila okungapheliko!—Jor. 2:13; Jwa. 4:10.
