JOEL 3:18 Kay profeciapi nin templomanta yaku phullchimusqanta, ‘Acacias chʼaki wayqʼotataj’ qarpasqanta. Joelpis Ezequielpis chʼaki jallpʼaman kausayta juntʼachej mayuta rikorqanku. Iskayninku rikorqanku mayoqa Jehovaj wasinmanta phullchimusqanta, nisunman templonmanta.

ZACARÍAS 14:8 Profeta Zacariasqa rikorqa “kausay yakus” Jerusalenmanta llojsimusqanta: Khuskanqa “inti llojsimuy mar qocha ladoman”, nisunman Wañusqa qocha ladoman, khuskantaj “inti yaykuy mar qocha ladoman”, nisunman mar Mediterráneo ladoman. Jerusalenqa ‘jatun Rey Jehovaj llajtan’ karqa (Mat. 5:35). Zacariaspa profecianpi chay llajtaj sutin rikhurisqanqa yuyarichiwanchej tumpamantawan Jehová kay jallpʼata kamachinanta. Unay watasña entiendenchej kay profeciamanta yakusqa Jehová paraisopi iskay tʼaqa kamachisninta bendecinanwan ninakusqanta: manchay ñakʼariymanta kausashaj llojsimojkunata, chay pasayta kausarimojkunatapis.

APOCALIPSIS 22:1, 2 Apóstol Juanqa Ezequielpa rikusqan mayuta jinallataj rikorqa. Jinapis Juanpa rikusqan mayoqa mana templomantachu llojsimun, manachayqa Jehovaj kamachina tiyananmanta. Chayrayku nisunman Zacariaspa rikusqan jinallataj Diospa Gobiernon waranqa watasta kamachishaspa bendicionesta apamunanwan ninakusqanta.

Jehovaj kamachina tiyananmanta llojsimoj bendicionespis Ezequielpa rikusqan bendicionesniyoj mayupis Jehovamanta jamun, tukuy kasukoj runasmantaj chayan.

SALMO 46:4 Kay versiculoqa iskay imasmantasina parlashan: yupaychaymanta, gobiernomantawan. Chay versiculopeqa nin uj mayu “Diospa llajtanpi tiyakojkunata” kusichisqanta. Chayqa yuyachiwanchej uj gobierno kamachisqanta. Chay mayoqa kusichillantaj ‘Aswan Patapi kaj Diospa santo llajtanta, may kʼachitu yupaychana toldontawan’. Chaytaj yuyachiwanchej Jehovallata yupaychakusqanta.

Kay versiculospi sutʼita reparanchej Jehová Diosqa iskaynejmanta kasukoj runasta bendecinanta. Uj kaj, gobiernonwan yanapachikusun. Iskay kaj, Jehovallata yupaychanapaj imastachus wakichisqanwan yanapachikusun, chay iskaynintaj wiñaypaj kanqa. Chaynejta Jehovamanta, Jesusmantawan jamoj ‘kausachej yakuta’ maskʼanallapuni, nisunman imastachus paykuna jatun munakuywan qowanchej wiñay kausayta japʼinanchejpaj chay imasta (Jer. 2:13; Juan 4:10).