JOWELI 3:18 Lesiphrofetho sikhuluma ngesiyalu lesisuka endzaweni lengcwele yelithempeli. Siyageleta kuze sinisele “Sihosha Setihlahla Temgamba” lesomile. Ngako boJoweli naHezekeli babona umfula loletsa kuphila endzaweni lelugwadvule. Kuto totimbili letimo, lomfula ugeleta uphuma endlini yaJehova nobe ethempelini.

ZAKHARIYA 14:8 Umphrofethi Zakhariya ubona “emanti ekuphila” ageleta aphuma edolobheni iJerusalema. Ihhafu yalamanti igeletela elwandle lolusemphumalanga nobe eLwandle Lolufile, bese lenye ihhafu igeletela elwandle lolusenshonalanga nobe Lwandle iMedithera. IJerusalema beyilidolobha “leNkhosi lenkhulu,” lokunguJehova Nkulunkulu. (Mat. 5:35) Ngako Zakhariya nakakhuluma ngalelidolobha usikhumbuta ngesikhatsi lesitako lapho Jehova atawubusa umhlaba wonkhe. Sekusikhatsi sicondza kutsi lamanti lakulesiphrofetho aveta kutsi Jehova utawubusisa emacembu lamabili ePharadisi, lokungulabo labatawusindza ekuhluphekeni lokukhulu nalabo labatawuvuswa ngemuva kwako.

SEMBULO 22:1, 2 Umphostoli Johane ubona umfula longumfanekiso lofana nalowo lowabonwa nguHezekeli. Kodvwa wona awuphumi ethempelini, usuka esihlalweni sebukhosi saJehova. Lombono, njengaloyo lowabonwa nguZakhariya, ugcizelela tibusiso letitawuletfwa nguMbuso waNkulunkulu Ngeminyaka Leyinkhulungwane.

Kuliciniso kutsi kunemehluko lomncane emkhatsini wetibusiso letitawuletfwa kubusa kwaJehova kanye naleto letimelelwa ngumfula lowabonwa nguHezekeli. Tonkhe letibusiso tichamuka kuJehova futsi tigeletela kubo bonkhe bantfu labetsembekile.

TIHLABELELO 46:4 Naka indlela lelivesi lelitiveta ngayo letintfo letimbili—kukhonta kanye nekubusa. Lana sibona umfula lojabulisa bantfu labahlala “edolobheni laNkulunkulu,” lokumelela uMbuso nekubusa, siphindze sibone ‘lithende lelikhulu lelingcwele laLosetikwako Konkhe,’ lokumelela kukhonta lokuhlantekile.

Natihlanganiswa letindzaba, tisicinisekisa ngekutsi Jehova utawubusisa bantfu labetsembekile ngetindlela letimbili. Sitawuzuza kuze kube phakadze, kwekucala, ekubuseni kwakhe, kantsi kwesibili, elungiselelweni lakhe lekukhonta lokuhlantekile. Ngako asitimiseleni nyalo kufuna “emanti ekuphila” lavela kuJehova Nkulunkulu naseNdvodzaneni yakhe, lokutintfo labasinakekela ngato kuze sitfole kuphila lokuphakadze!—Jer. 2:13; Joh. 4:10.