YOELE 3:18 Honovhu vhuporofita vhu amba nga ha tshisima tshine tsha khou elela tshi tshi bva fhethu hukhethwa thembeleni. Tshi elela u itela u sheledza “Govha ḽa Miri ya Muunga.” Yoele na Hesekiele vha vhona mulambo u ḓisaho vhutshilo fhethu hu sa anzeli u mela tshithu. Kha honoho vhuporofita vhuvhili, mulambo u elela u tshi bva nḓuni ya Yehova kana thembeleni.

SAKARIA 14:8 Muporofita Sakaria u vhona “maḓi a vhutshilo” a tshi khou elela a tshi bva muḓini wa Yerusalema. Maṅwe a eneo maḓi a elela a tshi ya lwanzheni lwa vhubvaḓuvha kana Lwanzheni lwo Faho. Maṅwe a elela a tshi ya lwanzheni lwa vhukovhela kana Lwanzheni lwa Meditherenieni. Yerusalema wo vha u “muḓi wa Khosi khulu,” ine ya vha Yehova Mudzimu. (Mat. 5:35) Musi Sakaria a tshi amba nga ha wonoyo muḓi, zwi ri humbudza nḓila ine Yehova a ḓo vhusa ngayo ḽifhasi ḽoṱhe tshifhingani tshi ḓaho. Ndi kale ri tshi pfesesa uri maḓi ane a khou ambiwa kha honovhu vhuporofita, a sumbedza uri Yehova u ḓo fhaṱutshedza zwigwada zwivhili zwa vhathu vha fhulufhedzeaho Pharadisoni. Ndi vhane vha ḓo ponyoka maṱungu mahulu na vhane vha ḓo vuswa nga murahu.

NZUMBULULO 22:1, 2 Muapostola Yohane u vhona mulambo wa pfanyisedzo une wa fana na we Hesekiele a u vhona. Fhedzi wonoyo mulambo u elela u tshi bva kha khuluṋoni ya Yehova, hu si thembeleni. U fana na kha bono ḽa Sakaria, ḽeneḽi bono ḽi amba nga ha phaṱhutshedzo dza Mudzimu dzine dza ḓo vha hone musi Yesu a tshi vhusa lwa Miṅwaha ya 1 000.

Zwi tou pfala uri phaṱhutshedzo dzine dza ḓo vha hone musi Yehova a tshi vhusa, a dzo ngo tou fhambanesa na dzine dza imelwa nga mulambo we Hesekiele a u vhona kha bono. Dzenedzo phaṱhutshedzo dzoṱhe dzi bva kha Yehova nahone dzi elela dzi tshi ya kha vhathu vhoṱhe vha fhulufhedzeaho.

PHISALEMA 46:4 Ṱhogomelani nḓila ine yeneyi ndimana ya ṱumanya ngayo vhurabeli na vhuvhusi. Kha yeneyi ndimana, ri pfa nga ha mulambo une wa ita uri “muḓi wa Mudzimu” u takale, zwine zwa sumbedza Muvhuso wa Mudzimu na vhuvhusi hawe. Hu dovha ha ambiwa nga ha “dennde ḽihulu ḽikhethwa ḽa Wa Ṱaḓulu-ṱaḓulu,” zwine zwa sumbedza vhurabeli ho kunaho.

Nga u tou angaredza, haya mafhungo a ri khwaṱhisedza uri Yehova u ḓo fhaṱutshedza vhathu vha fhulufhedzeaho nga nḓila mbili. Ya u thoma, ri ḓo vhuyelwa lwa tshoṱhe nga u vhusiwa nga Mudzimu. Ya vhuvhili, ri ḓo vhuyelwa nga ndugiselelo ya vhurabeli ho kunaho. Ngauralo, kha ri ḓiimisele zwino u ṱoḓa “maḓi a tshilaho” a bvaho kha Yehova Mudzimu na Murwa wawe. Ndi vhone vha ṋeaho vhutshilo vhu sa fheli ngauri vha a ri funa!—Yer. 2:13; Yoh. 4:10.